zazaki.net
17 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
15 Nîsane 2012 Yewşeme 09:24

Hûmara 118. ya Nûbiharî Safî bi Kirdkî Vejîya

Xebere: Zazakî.Net

Hûmara 118. ya kovara kulturî Nûbiharî safî bi kirdkî vejîya. Na reya verên a, yew kovara ke hertim bi kirdaskî vejîyayêne, yew hûmara xo seba kirdkî abirnena.

Kovara Nûbiharî serra 1992 ra nat Kurdîstanê vakurî û Tirkîya de kovara tewr emrderg a ke bi kurdkî weşanîyena.

Na hûmara Nûbiharî de çîyo tewr balkêş, di kurdanê kurmancan bi kirdî nuşto. Nînan ra yew edîtorê kovare Suleyman Çevîk, yê diyin zî nuştox Murad Celalî yo. Seke yeno zanayene, hetanî ewro zafê kirdan bi kurmancî nuştêne la zaf kêmî kurmancan bi kirdkî nuştêne.

Na hûmara safî kirdkî ya Nûbiharî de nuşteyê zaf muhîmî yê tarîxê kirdan estê. Nînan ra yew nuşteyê Wisif Zozanî yo ke bi sernameyê “Asmênê Kirdan ra Estareyêko Nimite: Mehemed Elî Ewnî” weşanîyayo. Wisif Zozanî roşinvîrê kirdan Mehemed Elî Ewnîyê Sêwregijî dano şinasnayîş. Ancî Mehmed Akyol nuşteyê xo yê bi sernameyê “Qetlîamê Dêrqamî” de fekê şahidan ra behsê qetlîamê dewa Dêrqamî keno ke badê herbê Şêx Seîdî virazîyabi.

Nuşteyêko zaf muhîm zî, yê şaîrê kurdan Cîgerxwînî yo ke J. Îhsan Esparî kurmanckî ra tadayo kirdkî ser. Cîgerxwîn, nuşteyê xo de behsê xatirayanê xo û tayê birayanê Şêx Seîdî keno.

Nuşteyêko balkêş zî yê Rindê Becerîklî yo. Rindê nuşteyê xo yê bi sernameyê “Hewn û Gêrayîş” de bi hawayêko sur-realîst behsê dinyaya xo ya xeyalî û dengêbêjê namdarî Evdalê Zeynikê û dewranê ey kena. Nuştoxanê cinîyan ra Bedrîye Topaç zî bi nameyê “Qisawete” nuşteyêko estetîkî nuşto. Nînan ra teber zî hema vajîn, nuşte, hîkaye û şîîrê ke na hûmara taybete ya Nûbiharî de ca girewto, pêro muhîm û balkêş ê.   

Na hûmara Nûbiharî de nuşteyê nê nuştoxan ca girewto: A. Samed Mîrzanî, Ahmed Kasimoglu, Ahmet Say, Bedîuzeman Seîdê Kurdî, Çino, Dogan Karasu, Ehmed Kirkan, Ferhad Vinderij, Huseyîn Karakaş, Îrfan Sîmserkîsij, Îzedîn Yildirim, Mela Mehmed Elî Hunî, Murad Canşad, N. Celalî, Newzat Dodanij, Newzat Valêrî, Receb Yigitbay, Roşan Lezgîn, Sadruddîn Saxnisî, Serdar Bedirxan, Serdar Melekanij, Seyîdxan Kurij, Umer faruq Çetînkaplan, W. K. Merdimîn û Yaşar Baluken.

Eke ziwanêk warê nuştişî de aver şiro, şansê ciwîyayîşê ê ziwanî hîna zêdîyeno. Ma hêvîdar ê ke vera-vera nuştoxê kirdkî zêde benê, kirdkî her ca yena nuştiş û wendiş, her warê cuye de sey kila Newroze roşn dana û yena qiseykerdiş.

Na xebere 1666 rey wanîyaya
No nuşte hema şîrove nêbîyo.