Hûmara 11. ya Şewçila Vejîya

Hûmara yewendesine ya kovara edebî hunerî Şewçila bi muhtewayêka dewlemende vejîya.

Sey hûmaranê verênan na hûmare de zî gelêk eserê neweyî yê edebî sey hîkayeyî, şîîr û nuşteyê cigêrayîşî estê. Çîyo tewr muhîm na hûmare de “Mem û Zîna Kirdkî” ke Mehdî Özsoyî serranê hewtayan de nuşta la hetanî nika qet cayêk de nêweşanîyaya û xebera kesî ci ra çin a, reya verêne na hûmara Şewçila de weşanîyena. Mem û Zîna Kirdkî, tercumeyê Mem û Zîna Xanî nîya, Mehdî Özsoyî sey telîf bi kirdkî nuşta. Mem û Zîna Kirdkî de 195 beytî, yanî 390 misrayî estê. Mem û Zîna Kirdkî ra çend beytî wina yê:

Wisar ig ûme, kên a vil, gulî

Newrûz id kêf êst qey qulûn qûlî

          In qeflê kênûn, ay ê lacûn û

          Xortûn û kalûn, pîrûn û cûnû

Va, roşûn Newrûz darîy’ decûn û

Mem îz darbic o, xort ay rocûn û

          Roşûn Newrûz vîst yowê edar id

          Mêm û Tajdîn; di ûmbaz Cizîr id

Roc Newrûz id kîrd vecên teberûn

Akerde verdên berûn, pencerûn

Nadîre Guntaş Aldatmaz bi sernameyê “Kirmanckî de Hîkayeya Moderne” de sey beşêkê edebîyatî behsê sinetê hîkaye kena û hîkayanê kirmanckî dana şinasnayîş.

Şeyda Asmîn, Alî Aydin Çîçek, Adir Dêrsimij, Seyîdxan Kurij û Îsmet Borî bi hîkayanê xo na hûmare de ca girewto. Ancî yew hîkayeya Yaqob Tilermenî seba kirdkî ameya tadayîş û na hûmare de ca girewto. Newzat Valêrî, Bedrîye Topaç, Hacer Petekkaya, Alî Aydin Çîçek, M. Mamet Qetekonij û Muhamed Deza Baturî zî bi şîîranê xo na hûmare xemilnaya. M. Mamet Qetekonijî derheqê nameyê raştkên yê kesan de yew ceribnayîş nuşto.

Fîhrîstê des hûmaranê Şewçila zî na hûmare de weşanîyayo. Goreyê melumatê ke fîhrîst de dîyenê, des hûmaranê Şewçila de 96 şîîrî, 89 hîkayeyî, 31 cigêrayîş/analîzî, 13 ceribnayîşî, 5 roportajî, 1 xebere û 1 zî sanike, pêro pîya 236 eserê 86 kesan weşanîyayê. Nînan ra eserê 15 kesan sewbîna çimeyan ra tercume bîyê. Êyê bînan rasterast Şewçila rê nuşto. Nê reqemî zaf akerde nîşan danê ke averşîyayîşê edebîyatê kirdkî de rolê Şewçila çend pêt o.