zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
29 Hezîrane 2017 Panşeme 17:47

Hûmara 100. ya Newepelî Vejîya

Nuştoxanê ena hûmare ra Alî Xaldî, Bawerê Axon, Suleyman Kaynun û Bêrîvan Bulut reya verên a ke nusenê.

Rojnameyo yewin o safî bi kirdkî (kirmanckî, zazakî, dimilkî) Newepel resa hûmara xwu ya seyine. Nuşteyê edîtorî yê na hûmare de îstatîstîkê 100. hûmaranê Newepelî winî dîyenê:

"100 hûmaranê Newepelî de 61 cinî, 300 camêrd, nuşteyê 361 kesan weşanîyayê. Nînan ra nuşteyê 44 kesan yan neqil bîyê yan zî tercume yê. Înanê bînan raşteraşt Newepelî rê nuşto. Nînan ra zî 250 ra vêşêr kesan reya verêne Newepel de dest bi nuştiş kerdo, bi seyan merdimî zî Newepelî dir musayî wendişê kirdkî. Înanê ke Newepel de dest bi nuştiş kerd ra davîst kesî, her yew kitabêk yan çend kitabê xwu weşanîyayê.

100 hûmaranê Newepelî de 44 hîkayeyî, 341 şîîrî, 319 xeberî, 319 nuşteyê derheqê ziwanî de, 590 nuşteyê muxtelifî û meqaleyî, 81 sanikî, 137 meselayî, 67 roportajî, 32 kayê domanan, 49 fiqrayî, 53 deyîrî, 6 nuşteyê cigêrayişî, 34 mesajî, 42 tarîfê werdî û gelêk nuşteyê bînî yê sey mewlidî, efsaneyî, çibenokî, mamikî, lorîgî, îdyomî, vateyê verênan, miqlatikî, lezvateyî, karîkatur û fotografî weşanîyayê."

Roportajê ena hûmare Alî Aydin Çîçekî edîtor û redaktorê Newepelî  Roşan Lezgînî dir kerdo. Roşan Lezgîn roportaj de behsê prosesê Newepelî û tecrubeyanê xwu keno. Welat Ramînazadî zî nuşteyê xwu de komelê kirdan ser o behsê tesîrê pozîtîf yê rojnameyê Newepelî kerdo.

Murad Canşad, Alî Xaldî, Îdrîs Yazar, Sedef Kandemîr û Necîbe Kirmizigul bi nuşteyanê xwu rojname de ca girewto.

Bedrîye Topaç, Mihanî Licokic, Bawerê Axon, Suleyman Kaynun û Abdulah Yakişanî bi şîîranê xwu rojname xemilnayo.

Dr. Daîmî Cengizî hetê Dêrsimî ra, fekê Kalê Qizî ra yew deyîra tarîxî, Mehmed Emenî zî yew sanike arêdaya. Wesîle Doğuç yew mesela û Mizgîn Kulata zî yew mamike arêdaya, Bêrîvan Bulut tarîfê çoreganê roşanî nuşto.

Nînan ra teber, nameyê nebatan, ferhengek û xaçepers rojnameyî temam kenê.

Nuştoxanê ena hûmare ra Alî Xaldî, Bawerê Axon, Suleyman Kaynun û Bêrîvan Bulut reya verên a ke nusenê.

Na xebere 10582 rey wanîyaya
No nuşte hema şîrove nêbîyo.