zazaki.net
25 Teşrîne 2017 Şeme
Girdîya Karakteran : 12 Punto 14 Punto 16 Punto 18 Punto
19 Tebaxe 2013 Dişeme 10:15

Hûmara 10. ya ŞEWÇILA Vejîya

Des hûmaranê Şewçila de 96 tene şîîrî, 85 hîkayeyî, 16 nuşteyê cigêrayîşî, 5 roportajî, 9 ceribnayîşî, 12 nuşteyê analîzî.. pêro pîya 207 eserî weşanîyayê.

Hûmara 10. ya kovara edebî hunerî ya safî bi kirdkî Şewçila ancî bi muhtewayêka dewlemende vejîya.

Nuşteyê edîtorî yê na hûmare de derheqê des hûmaranê kovara Şewçila de wina melumat dîyeno:

Nê des hûmaran de 4 ci ra tercume 96 tene şîîrî, 11 ci ra tercume 85 hîkayeyî, 16 nuşteyê cigêrayîşî yê warê edebî-hunerî de, 5 roportajî, 9 ceribnayîşî, 12 nuşteyê analîzî, 1 xebere, 1 sanike û 1 zî mesaj, pêro pîya 207 eserî weşanîyayê. Eke mewzû kirdkî bo, nê reqemî zaf cidî û muhîm ê.

Na hûmare de di nuşteyê balkêşî hetê wendekaranê malimîya dersa weçînita yê Unîversîteya Artuklu ra amade bîyê. Nê nuşteyî sey projeyê temamkerdişê perwerdeyî amade bîyê la bi terzê tezê qedênayîşê lîsansî yê. Nuşteyo verên yê Remzî Gelenerî yo û sernameyê xo “Kitabê Roşan Lezgînî ‘Ez Gule ra Hes Kena’ de Unsûrê Folklorîkî” yo. Remzî Gelenerî hetê folklorî ra hîkayeyê ke nê kitabî de ca gênê tehlîl kerdê. Nuşteyo bîn zî yê Sevîm Aydine yo. Sevîme nuşteyê xo de hunermendê kurdan Saîd Bakşî ke bi xebata xo ya muzîkî namdar o dayo şinasnayene, gelêk deyîrê ey arê dayê û xebata xo de nîşan dayê.

Na hûmare de ancî çend hîkayeyê muhîmî estê. Nînan ra Mutlu Canî bi nameyê “Provaya Mergî”, Alphonse Daudetî bi nameyê “Estare”, Bedrîye Topaç bi nameyê “Cinîyê Dîcle”, Dr. Sebahedîn Borî bi nameyê “Eyşi” û Seyîdxan Kurijî bi nameyê “Trajedîya Zebeşan” bi hîkayeyanê xo na hûmare xemilnaya.

Ancî Newzat Valêrî, Îdrîs Yazar, M. Mamet Qetekonij, Adem Karakoç, Muhamed Deza Batur, Umer Farûq Ersoz û Dilo Bargiranî zî her yewî bi yew şîîre kovare de ca girewto.

Nînan ra teber, Roşan Lezgîn, Çetîn Satici, Nadîre Guntaş Aldatmaz û Esat Namdarî zî bi nuşteyanê xo yê cigêrayîşî kovare temam kerda.  

Na xebere 1565 rey wanîyaya
No nuşte hema şîrove nêbîyo.