zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
27 Adare 2010 Şeme 21:11

Gundiz Kocadag Şi Rehmet

[Xebere]
Zazakî.NET

Welatperwero hêca û dilsoz Gundiz Kocadag roja 26.03.2010 de, bi saeta Londra 20:00 de şi rehmet.

Gundiz Kocadag, 20 adare 1959 de dewa Gimgimî Gestemerde de maya xo ra beno. Domanîya xo dewe de vêrena ra. Hardlerzê 1966î de dewlete domananê sawîyan kena top, bi kamyonan mektebanê yatilîyan û êtimxaneyan ra kena vila. Gundiz kî nê domananê ra ju yo. Ê kî benê erzenê mektebê yatilî yê Reyhanlîyê Hatayî.
Ma mordem ke domanîye de maya xo ra, welatê xo ra, nas û dostanê xo ra, hevalanê xo ra ravisîyo, se beno? No ganî ê kesan ra biyêro perskerdene. Hesreta welatî û maye mordemî helênena, qelênena. Gundizî, domanîya xo de na hesrete anceno û xerîbîye de nêweş kuno.

Gundizî mektebo verên Reyhanlî de, orte û lîse kî Gimgim de qedêneno.

Gundiz kî fênda zafîne Hereketê Azadîya Kirmancîye ra nasîbê xo gêno û beno sempatîzanê hizbê Rizgarîye. 1981 de Gundiz, Ayhan Bingol û Zafer Polatî çarşîyê Gimgimî de bi şewe vejîne dardekerdena afîş û nûsnayena sloganan. Çarşîyî bi afîşan û slogananê fênda‚ “Bijî Azadî!” “Bijî Yek Gulan!” “Kurda ra Azadî” neqişnenê. Hîrêmîna hevalî ênê guretene û 2 rojî qereqolê cendirman yê Gimgimî de manenê. Zafer Polat Gimgim de verdîno ra, Gundiz û Ayhanî alaya cendirman yê Mûşî de ju hefte, Xarpêt de 1800 Evler de kî 2 hefteyî manenê. Gundiz, têvter 3 hefte binê îşkenceya cunta de meneno. Peyê cû bi bira mehkemeyî ênê raverdayene.

Gundiz derbazê Îstanbulî beno, uca xebetîno. Demê ra tepîya şono Londra, Îngilîstan. Û roja 26.03.2010 de Londra de wefat kerd.



Cuyayenêde kilmeke lê bi rûmete vîyarneno ra.

Welat ra dûrî, xerîbîye de merdene zaf zor a. Coka wesêt kerdo ke bîyêro vêşnayene, çengê wela xo birzîyo re deşt û koyanê dewa xo Gestemerdeyî.

Wesêtê merdan, merdan de meşorê…

Ma keso welatperwer mordemî vîrî ra şono? Nêy!.

Gundizo Bira, ma to xo vîrî ra nêkenîme û ti do her tim zerrîya ma de bicuyê!

___________

Çime: www.gestemerde.com

Fotograf: Yaşar Karadogan

Na xebere 1498 rey wanîyaya
No nuşte hema şîrove nêbîyo.