zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
16 Sibate 2011 Çarşeme 15:46

Fîlmêk Derheqê Sunnetkerdişê Cinîyan de

Xebere: Zazakî.Net

Kurdîstanê Başûrî de derheqê sunnetkerdişê cinîyan de seba hîşyarkerdişê şarî fîlmêk ame nîşan dayene.

Bi munasebetê serrgêra qedexekerdişê sunnetkerdişê cinîyan, paytextê Kurdîstanê Başûrî Hewlêr de salona Galerîya Serdemî de fîlmêk bi nameyê “Mişte Xole Kewe” ame nîşan dayene.

Senaryo û dîrektorîya fîlmî hetê Cemal Nebezî ra virazîyayê, fînansmanê fîlmî zî hetê dezgeyê Wadî yê Almanya ra ameyo dayene. Fîlm mintiqaya Germîyanî de ameyo antene.

Demeyê nîşandayîşê fîlmî de gelek cinî û nûnerê rêxistinanê cematê sivîlî amade bîy. Badê nîşandayîşê fîlmî temaşekaran derheqê babeta sunetkerdişê cinîyan û muhtewaya fîlmî de munaqeşe kerd û fikrê xo beyan kerd.

Dîrektorê fîlmî Cemal Nebezî derheqê fîlmî de va: “Fîlm, Kurdîstan de sunnetkerdişê cinîyan nawneno. Nika cîhan de zî kampanyayêka hîraye yena organîze kerdene ke sunnetkerdişê cinîyan bêro qedexe kerdene.”

Karbidestê rêxistina Wadî ya Almanya yê Kurdîstanê Başûrî Felah Murad Xane zî va: “No fîlm seba hîşyarkerdiş û qedexekrdişê nê karê teberê medenîyetî de çend serrî verê cû bi teknîk û keresteyanê normalan amebi antene.”

Hana Şiwan ke berpirsîyara rêxistina Nawendî Rêwan a, derheqê fîlmî de va: “Ganî fîlm de derheqê tarîxê sunnetkerdişê cinîyan de zî malumat biameyêne dayene. Heme cayanê Kurdîstanî de sunnetkerdişê cinîyan çin o. Tena mintiqayêk de esto, axir hêdî-hêdî mîyan ra wedarîyêno.”

Na xebere 1478 rey wanîyaya
No nuşte hema şîrove nêbîyo.