zazaki.net
23 Tebaxe 2017 Çarşeme
Girdîya Karakteran : 12 Punto 14 Punto 16 Punto 18 Punto
16 Adare 2013 Şeme 21:04

FÎHRÎSTÊ 48 HÛMARANÊ NEWEPELÎ

48 hûmaranê Newepelî de, nuşteyê ke eseran ra neql bîyê ne tede, 130 camêrd 18 cinî tam 148 kesan bîzat nuşto. Nînan ra qasê 120 kesan reya verêne Newepel de dest bi nuştiş kerdo.

 Rojnameyo kulturî yo 15 roje Newepel sey rojnameyo yewin o safî bi kirdkî roja 15 adare 2011 de dest bi weşanayîşî kerd. Newepelî bi hûmara xo ya 48. ke roja 01 adare 2013 de vejîya, tam di serrê xo temam kerdî. Mîyanê nê di serran de her hûmara Newepelî bi hawayêko perîyodîk tam zemanê xo de vejîya.

Nê 48 hûmaranê Newepelî de 265 nuşteyê muxtelîfî, 217 xeberî, 216 nuşteyê derheqê ziwanî de, 115 şîîrî, 43 fiqrayî, 31 sanikî, 30 meselayî, 28 roportajî, 25 grûbê arêdayeyê folklorîkî yê sey vateyê verênan, îdyom, mamik û lorîgî, 18 deyîrî, 15 hîkayeyê modernî, 15 mesajî, 5 mektubî û 3 nuşteyê vateyanê wecîzan weşanîyayê.

48 hûmaranê Newepelî de, nuşteyê ke eseran ra neql bîyê ne tede, 130 camêrd 18 cinî tam 148 kesan bîzat nuşto. Nînan ra qasê 120 kesan reya verêne Newepel de dest bi nuştiş kerdo. Zafê nê nuştoxan ciwan ê, qismêko muhîm yê nê nuştoxan êdî daîmî nusenê. Bi seyan kesî zî çarçewaya vilabîyayîşê Newepelî de wendişê kirdkî musayê.

Eke merdim biewnîyo profîlê nuştoxanê ke Newepel de nuşto ra, tabloyêko winasî vejîyeno meydan. Nuştoxanê ke Newepel de nuşto ra di hebî eslê xo kirdasî yê, ê bînî heme kird ê. Erzingan ra bigîrîn heme mintiqayê Dêrsimî û heta bi Gimgim, Motkan ra bigîrîn heta bi Çewlîg û qismêk qezayê Çewlîgî, Dîyarbekir û zafê qezayê Dîyarbekirî, Xarpêt û qismêk qezayê Xarpêtî, qezayê Ruha Sêwregi û Curnê Reş, Alduş ra bigîrîn hetanî Puturge û Aqsaray, hema vajîn ke heme cayanê ke tede kirdkî qisey bena ra nuştoxî estê. Hetê bawerîye ra zî, hem elewî hem sunnî yê. 

Newepel, sere de Dîyarbekir, şaristananê kurdan ra Çewlîg, Xarpêt, Dêrsim, Mêrdîn, Sêwregi, Bongilan û Erxenî de, ancî şaristananê Tirkîya ra zî, Anqara, Mêrsîn, Îzmîr û Îstanbul de bi hawayêko pêroyî vila beno. La zafê şaristanan de zî bi sîstemê aboneyîye vila beno.

Teberê Tirkîya de zî, sere de Almanya, zafê welatanê Ewropa de, Kurdistanê Başûrî ra bigîrîn heta bi Rûsya û Awustralya, bi hawayêko muntezem reseno destê aboneyan.

Newepel, çarçewaya xebata Komela Ziwan Huner û Kulturî (Ziwan-Kom) de vejîyeno. Na komele temmuza 2010î de Dîyarbekir de hetê grûbêk kurdperweran ra seba pawitiş, averberdiş û aktuelkerdişê kirdkî ronîyabî.

Vetiş û vilakerdişê rojnameyê Newepelî de keda zaf kesan ya madî û manewî esta.

Fîhrîst de nuşteyê her hûmare bi hawayêko kronolojîk cîya-cîya ameyê rêzkerdiş. Nuşteyî zî, sere de nameyê nuştox yan nuştoxe (tercume, transkrîpsîyon, arêkerdox…) nusîyayo, dima sernameyê nuşteyî bi hawayêko îtalîk nusîyayo, kîşta sernameyî de mîyanê parantezî de tewirê nuşteyî nusîyayo, vajîme sey (nuşte, ziwan, şîîre, hîkaye, sanike ûsn), dima bi reqeme hûmara Newepelî ke nuşte tede weşanîyayo û badê nê îşaretî (/) zî rîpelê ke nuşte tede yo, nusîyayo.

Roşan Lezgîn

Dîyarbekir, 10.03.2013

Seba dosya bitikne>>>

Na xebere 1677 rey wanîyaya
No nuşte hema şîrove nêbîyo.