Dunya Tv Dest bi Weşane Kerd

Kanalê televîzyonî Dunya Tv ke hetê cematê Fetulah Gulenî ra organîze beno dest bi weşana testî kerd.

No serrêk ra vêşêr o ke amadekarîya ronayîşê nê kanalî beno. Merkezê kanalê Dunya Tv şaristanê Entabî de yo û bi kurdkî (kurmanckî) weşane keno.

Akerdişê destpêkî de mudirê Dunya Tv Remzî Ketenci va, “Ma do seraserê aşma Remezanî de gola maseyan ya Ruha ra programê fitare virazin. Dunya Tv de fîlmê serîyalî yê bi nameyê ‘Mêvan’, ‘Dengbêj’ û ‘Dengê Gel’ ke ma bi xo viraştê do bi kurdkî (kurmanckî) bêrê weşanayene. Hewna, bultenê xeberan de derheqê mintiqa de xeberê tezeyî do Dunya Tv ra bêrê weşaneyene.”

Dunya Tv versîyonê Samanyolu Tv yo û Turksat 3A, Frekans: 11064 V, Seymbol Rate: 13000 FEC: 5/6 ra yeno temaşe kerdene.