zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
12 Çele 2011 Çarşeme 08:25

Dîrektor Taximê Xo Otele ra Îdare Keno

Xebere: Zazakî.Net

Dîrektorê taximê mîllî yê futbolî yê Îraqî Wolfang Sidka maçanê taximê xo Hewlêr de yew otele ra teqîb keno. Dîrektor muşkileyanê asayîşî ra nêşêno şiro Bexdad, coka dûrî ra taximê xo îdare keno.

Wolfang Sidka ke futbolîstêko namdar yê almanan o û serranê 1980an de taximanê sey Herta BSC, München 1860 û Werder Bremen de tope kay kerdêne, aşma tebaxe ya 2010î ra nat bîyo dîrektorê teknîkî yê taximê mîllî yê futbolî yê Îraqî. Wolfang Sidka vano, “Hewlêr de kurdî hol miqateyê mi benê. Hedefê mi no yo ke taximê mi kupaya Asya bigêro, labelê ganî ez bişênî tîya ra vejîyî.”

Wolfang Sidka vano, “Mi tena reyke Bexdad dîyo. O zî, gama ke ma Urdun ra ameyêne, teyareyê ma Bexdad de na ro, la bê ke ez meydanê teyareyan ra vejî teber, hewna ez wenişta teyare û ameya bi Hewlêr.”

Wolfang Sidka, nê hîrê serranê peyênan de dîrektorê çarin o ke taximê mîllî yê furbolî yê Îraqî îdare keno. Wolfang Sidka vano, “Hetanî ke ez resaya tîya ma tam 40 nuqteyanê kontrolê asayîşî ra vîyartîy. Hewlêr de kurdî mi rê zaf hol ê. Tîya her çî esto; restorantê almanan, heşt tewirî bîra, ti çi biwazî peyda beno.”    

Na xebere 1399 rey wanîyaya
No nuşte hema şîrove nêbîyo.