zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
26 Gulane 2010 Çarşeme 08:38

Do Pêşmergeyî Sînorê Kurdîstanê Başûrî Bipawê

[Xebere]
Zazakî.NET

Nê demeyê peynîyan de dewleta Îranî mintiqaya Kurdîstanê Başûrî pêsero topbaran kena. Naye ser o fermandaranê Wezaretê Pêşmergeyan yê Kurdîstanê Başûrî ra Mehmûd Sengawî roja 19.05.2010 de beyanatêk vila kerd û va, “Ma mecbur ê vera hêzanê ke erdê Kurdîstanê Başûrî de yê û dewletanê cîranan reyde şer kenê vejîyê.”

Mehmûd Sengawî beyanatê xo de va, “Seba ke ma sînorê xo û dewletanê cîranan bikerin mîyanê halê ewledarîye, ma PJAK ra teleb kerd ke nêkewo mîyanê sînorê Kurdîstanê Başûrî.” Mehmûd Sengawî va, “Ma şerê birakujîye qedexe kerdo û ma heram vînenê. La eke tayê hêzê çekdarî sînoranê mintiqa îhlal bikerê û dewletanê cîranan reyde şer bikerê, ma do bi şîdet vera înan de bin. Coka ma do nuqtayanê serê sînorê Kurdîstanê Başûrî de pêşmergan bi ca bikerin.”

Karbidestê Kurdîstanê Başûrî herçiqas “şerê birakujîye” nêwazenê la bi no qayde îhtîmal esto ke mîyanê kurdan de “şerê birakujîye” reyna dest pêbikero û bi destê kurdan gonîya kurdan birijîyo.

Roja 20.05.2010 zî 20 firokeyanê şerî yê Tirkîya serê sibayî ra hetanî şan mintiqayê Xakurke, Henare û Zabî yê Kurdîstanê Başûrî bombarduman kerdîy. Goreyê beyanatê sererkanîya Tirkîya, di serranê peyênan de no operasyonê hewayî yo tewr gird bîyo û 50 hedefî nêzdîye ra ameyê pirodayene. Operasyon de fuzeyê ke bi lazerî qumanda benê ameyê gurenayene. Operasyono ke tena hewa ra virazîyayo, îstîxbaratê ey hetê DYA ra dîyayo la firokeyê casusîye ke bêmerdim firrenê ke Tirkîya nê demeyanê peynîyan de erînaybîy zî operasyon de ameyê gurenayene.

Na xebere 1830 rey wanîyaya
No nuşte hema şîrove nêbîyo.