Cinsê Nebatan Tehluke de yê

Goreyê netîceyê cigêrayîşan ra, dinya de her panc tewiranê nebatan ra yew tehluke de yo.

Cigêrayîş û tehqîqê ke serektîya Baxçeyê Botanîkî yê Qralîya Îngilîstanî de virazîyayê, tesbît bîyo ke nika dinya de 380 hezar tewir nebatî estê. La netîceyê fealîyetanê însanan de her panc tewiran ra yew rî bi rîyê tehlukeyê vindîbîyayîşî yo. Cigêrayoxî raporê xo de danê zanayene ke tehlukeyo tewr gird, seba peydakerdişê hêgayanê zîretî çinkerdişê daristanan o.

Pisporo îngilîz Prof. Stephen Hopper na babete de vano, “Tewiranê nebatan ra se ra 22 tehlukeyê vindîbîyayîşî de yê. Nînan ra qismêk merheleyêka krîtîke de yê. Ma nêşênê xo rê ronişin û temaşeyê vindîbîyayîşê nebatan bikerin. Dinya de kerreyê bingehînî yê heyatî nebat ê.”

Goreyê xebera ke BBC weşanaya, raporê cigêrayoxan do konferansa zaftewirîya bîyolojîkîye de ke hetê Yewîyîya Neteweyan ra Japonya de virazîyêna munaqeşe bibo.

Konferansa ke Japonya de virazîyêna de yeno plankerdiş ke seba pawitişê candaran do hedefê neweyî tesbît bibê.