zazaki.net
23 Nîsane 2017 Yewşeme
Girdîya Karakteran : 12 Punto 14 Punto 16 Punto 18 Punto
28 Gulane 2016 Şeme 08:16

Çewlîg de Suhbet û Îmza

Roşan Lezgînî destpêkê programî de derheqê ziwanan de melumatê umûmî dayî ke zafê ziwanan de şaxî ameyê meydan û zemanî reyde bîyê lehçe yan şîve.

Nuştox Roşan Lezgînî Çewlîg de kitabê xo îmza kerdî.

Kurdî-Derê Çewlîgî seba nuştox Roşan Lezgînî roja îmza amade kerde. Programê îmza û suhbetî roja 26 gulane 2016, saete 17:00 de salona Eğitim-Senî de virazîya.

Roşan Lezgînî destpêkê programî de derheqê ziwanan de melumatê umûmî dayî ke zafê ziwanan de şaxî ameyê meydan û zemanî reyde bîyê lehçe yan şîve. Roşan Lezgînî va, "Mesela, newês lehçeyê erebkî estê, da-vîst lehçeyê tirkî estê. Sey ziwanêko qedîm, yê kurdkî zî panc lehçeyê xo yê girdî estê. La karakter û xusûsîyetê bingeyênî yê her panc lehçeyanê kurdkî yew o. Heto bîn ra, kokê se ra hewtay-heştayê çekuyanê her panc lehçeyan zî yew o." Û mîyanê ziwananê dinya de cayê kurdkî ra behs kerd. Badê cû, munaqeşeyê ziwan û lehçe ra ke derheqê kirdkî de beno ra behs kerd û va, "Tesnîfkerdişê ziwanan û lehçeyan neke formê çekuyan û fehmkerdiş-fehmnêkerdişî ser o, esas ganî sîstemê ziwanî ser o bibo." Cuwa pey zî têkilî û muşterekîya bingeyîne ya mabeynê kirdkî û lehçeyanê bînan yê kurdkî ra behs kerd. Peynî de zî cewabê persanê mêmanan dayî.

Badê suhbetî beşdaran kitabê Roşan Lezgînî dayî îmzakerdiş.

Program şan de saete 17:00 de dest pêkerd 19:00 de qedîya.

Badê nê programî Roşan Lezgîn beşdarê kombîyayîşê Grûba Wendişê Kirdkî ya Çewlîgî bi. Grûba wendişî, nê kombîyayîşê xo de kitabê Roşan Lezgînî “Tarîyîya Adirî de” wendibi. Bi beşdarîya Roşan Lezgînî kitabê hîkayeya “Tarîyîya Adirî de” ser o analîzî kerdî. Endamanê grûbe çekuyê ke manaya înan nêzanê û tayê qaydeyê îmla nuştoxî ra persayî. Dima suhbeto kilmek de Roşan Lezgînî derheqê edebîyat û nuştoxîya xo de tayê melumatî dayî. Grûba wendişî Roşan Lezgînî ra seba yewna kombîyayîşê xo de mêmanbîyayîşî soz girewt û na şewa dekerdîye qedîya.

_________

Çime: Kirdki.com

Na xebere 2744 rey wanîyaya
No nuşte hema şîrove nêbîyo.