Çapa Dîyine yê Kitabê Dersanê Kirmanckî (Zazakî) Vejîya

Çapa dîyine yê kitabê dersanê kirmanckî (zazakî) “Türkçe Açıklamalı Kırmancca (Zazaca) Dil Dersleri” vejîya.

Kitabo ke hetê Deniz Gunduzî ra amade bibi û M. Malmîsanijî kontrol kerdbi, reya verêne 2006 de ginabi çape ro û rewna ra pîyase de nêmendbi.

Kitab goreyê qaydeyanê xebata standardîzekerdişî yê Grûba Xebate ya Vateyî amade bîyo. Ê ke bi tirkî wendiş û nuştişê înan esto, şênê xo bi xo qaydeyanê gramerê kirmanckî (kirdkî/zazakî) bimusê.

Kitab heme 369 rîpelî yo 22 dersî tede estê. Her derse ra pey, seba ke wendoxî dersa xo tam fehm bikerê, temrînî estê. Her derse de qismê gramerî yê derheqê derse zî bi nimûneyanê dewlemendan pêşkêş beno. Badê her derse seba manaya tirkî ya çekuyanê kirmanckî yew ferhengek ronîyayo.

Nuştoxê kitabî Deniz Gunduz destpêkê kitabî de wina vano: “Tadaya seserran ya ke kurdkî ser o estbî hîna zî dewam kena (…) Lehçeya kurdkî ke bi nameyanê kirmanckî, kirdkî, zazakî û dimilkî name bena, tewr zêde na rewşe ra mutesîr bîya û tewr zêde texrîb bîya. (…) Na xebate netîceyê dersanê ke mi zerfê şeş serran de cayanê cîya-cîyan de dayê û notê ke mi nê dersan de girewtê ra ameye meydan.” Yanî, na xebate netîceyê pratîkêkê ceribnayî ya. Qismêk şaşîyê herfan ke çapa verêne de estbîy çapa dîyine de ameyê rastkerdiş.

Adresa waştişî:

Vate Yayınları

Katip Mustafa Çelebi Mahallesi, Tel Sok. No: 18 Kat: 3

Beyoğlu – İstanbul

Tel: 0 212 244 94 14

e-post: wesanxaneyevateyi@hotmail.com 

Deniz Gunduz, Türkçe Açıklamalı Kürtçe (Kırmancca/Zazaca) Dil Dersleri, Çapa Dîyine, Weşanxaneyê Vateyî, Îstanbul 2010, 366 rîpelî