Bonn’de Pêşangeyê Resam Mehmûd Celayîrî

Resamê kurd Mehmûd Celayîrî roja 18 hezîrane de bajarê Bonî yê Almanya de bi nameyê “Rayîrê Qralî Ser o” yew pêșengeyê resman akerd.

Merasîmê akerdişê pêşangeyê Mehmûd Celayîrî de waharê galerîya hunerî Judith Andrea qisey kerd. Andrea xanime hunerê Mehmûdî û resmanê ey ser o malumat da hedreyan.

Cuwa pey Dr. Arta Valstar-Verhoff bi taybetî xebatê Mehmûdî û terzê hunerê ey ser o qisey kerd. Mehmûdî zî bi kirdkî yew șîîra bi nameyê “Kok”î ke ey semedê kokê xo ya nușta wende, yew aktorê almanî zî na șîîre bi almankî wende.

Badê cû, hunermendê kurd Nîzamedîn Ariçî bi muzîkê xo yo enstrumental û kilamanê xo ya yew konser pêșkêș kerd. Ariçî eserê xo yê neweyî yê bi nameyê “Roboskî” û “Serê Kanîyê” zî pêșkêș kerdî.  

Na pêşengeyê “Rayîrê Qralî Ser o” do beyntarê rojanê 18 hezîrane û 27 temmuze de akerde bo.

Mehmûd Celayîr 1950 de Çewlîg de ameyo dinya û 1972 de Îstanbul de akademîyê hunerî qedênayo. Heta nika Tirkîya, Almanya, Fransa û Îtalya de xeylêk pêşangeyê şexsî û grûbî akerdî û çend zî xelatî girotî. 1986 ra nat 20 serrî ra zêdeyêr o ke Almanya de bajarê Stuttgartî de ciwîya. Nika Îstanbul de ciwîyeno û xebata xo ya hunerî uca domneno.

Cayê Pêşangeyî:

Galerie Judith Andrea

Bachhöfe – Paul-Kemp-Str. 7

53173 Bonn