zazaki.net
17 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
12 Gulane 2010 Çarşeme 09:30

Birca Beleke Bêwayîr Mende

[Xebere]
Zazakî.NET

Birca Beleke, merkezê mîrekîya Botanî, warê Bedirxan Begî bi. Badê ke mîrekîya Bedirxan Begî hetê Osmanîyan ra mîyan ra ameye wedartene, kewte destê Osmanîyan û artêşa tirkan rê bîye qişle.

Badê se û pancas serran, roja 12ê sibata 2010î de artêşa tirkan Birca Beleke ra vejîya û birce teslîmê qaymeqamîya Cizîre kerde. Labelê herinda ke planê masterê aye vejê û turîzmê rê akerê, na rey tayê dezgeyê bînî yê dewlete dekewtê birce.

Badê ke artêşa tirkan vejîya, Birca Beleke nika sey bînaya Serektîya Grûbê Tenduristîye (Sağlık Grup Başkanlığı) ke girêdayeyê Wezaretê Tenduristîye ya yena gurenayîş. Xora Birca Beleke demeyo ke destê artêşe de bî, kulîyatê aye ra zaf qismî bêwayîrîye ra rijîyaybîy û artêşe goreyê îhtîyacê xo nê qisman ser o bînayî viraştbîy. Bînayê ke artêşe dorê Birca Beleke de viraştê zî nika keyeyê polîsan şîyê dekewtê înan. Qismêkê Birca Beleke zî Mudîrîyetê Zîretî yê Qeza (İlçe Tarım Müdürlüğü) rê texsîs bîyo.

Qaymeqamîya Cizîre îdîa kena, bînayê ke dima ra ameyê viraştene aîdê kulîyatê Birca Beleke nîyê. Labelê Mudirîyetê Turîzmî yê Şirnexî zî vano, planê esasî yê Birca Beleke nêameya viraştene û dewrê înan nêbîya.

Temsîlkarê Weqfa Seveknayîşê Erjanê Kulturî yê Derûdorî (ÇEKÜL Vakfı) yê Şirnexî Abdulcebar Îgdî zî vano, hîna tu planê masterî yê Birca Beleke nêvirazîyayo û dezgeyê resmî yê ke mîyanê qela de fealîyet kenê zî zerar danê şeklê tarîxî yê birce. Abdulcebar Îgdî vano, projeyê restorasyonî ke verê cû ameybîy viraştene, seba ke roluvekerdişê projeyanê restîtusyonî goreyê rewşa birce ya nikayî nêbîy, coka ê projeyî betal ê. Eke bînayê Birce Beleke bi temamî nêvejîyê meydan, goreyê eslê xo ra restore zî nêbenê. 

Şarê Cizîre rewşa Birca Beleke ra narehet o. Şar wazeno planê esasî yê birce tesbît bibo, planê masterê aye bêro viraştene, restore bibo û bikewo xizmetê turîzmî. Tayê tarîxnasî vanê na qela çar hezarî serrî ra, ta wextê gutîyan ra esta. Şarê Cizîre wazeno şaristanê înan zî mîyanê şaristananê biqela yê cîhanî de bêro qeyd kerdene.

___________________

Çimeyê xebere û resman: http://www.yuksekovahaber.com, 29 Nîsane 2010 Panşeme 12:32

Na xebere 1456 rey wanîyaya
No nuşte hema şîrove nêbîyo.