zazaki.net
23 Tebaxe 2017 Çarşeme
Girdîya Karakteran : 12 Punto 14 Punto 16 Punto 18 Punto
07 Hezîrane 2010 Dişeme 08:32

Beyanatê Netîceyî yê Kogreya 7. ya PENa Kurd

[Xebere]
Zazakî.NET

Kongreya 7. ya asayî ya PENa Kurd rojanê 22-23yê gulana 2010î de bi beşdarîya endamanê merkezî, Kurdîstan û teberê welatî şaristanê Almanya Königswinter de virazîya.

Kongre bi deqayêk rêzgirewtişê seba şehîdanê doza azadîya Kurdîstanî, bitaybetî seba nuştox û rojnamegeranê ke wextê mîyanê kongreyanê 6. û 7. de rayîrê azadîya welatî de yan zî bi hesreta azadîya welatî cuya xo dest ra daya, karê xo dest pêkerd.

Dima, rojevê kongre ke raporanê kar û xebata serranê vîyarteyan, raporê karê komîteyanê PENe ra girêdayeyî, tetkîk û qerarê derheqê raporan de, wendişê selamnameyanê endamanê ke bi rayîrê e-mailan mesajê xo şawitê, weçînayîşê serek û endamanê komîteya îdarekerdoxe û pêşnîyazê endaman seba xebata îstîqbalî ameyêne pê, hetê beşdaran ra amey qebûl kerdene.

Raporê komîteya îdarekere ya verêne de tetkîkêko pêroyî rewşa welat û tesîrê rewşa sîyasî û edebîyatê kurdkî û aktîvîteyanê PENa Kurd ser o ca girewtbi.

Endamanê beşdaran kongre de bi tetkîkkerdişêko rexneyî karanê komîteya verêne ra raporê komîteya îdarekerdoxe bi tayê sererastkerdişan û zêdekerdişan qebûl kerd. Dima, raporê komîteyanê ke PENe ra girêdaye yê, Komîteya Nuştoxanê Zindanîyan, Komîteya Nuştoxanê Aştîye, Komîteya Cinîyanê Nuştoxan, Komîteya Heqanê Ziwan û Çarnayîşî pêşkêş bîy, ameyî tetkîk kerdene û qebûl bîy.

Kogre, qismêkê bînî yê karê xo de, xebata çar serranê vîyarteyan yê Komîteya Îdarekerdoxe bi hawayêko cidî û rexneyanê viraştoxîye tetkîk kerd.

Hewna, kongre kar û xebatê PENe, eserê aye, çarçeweya weşana aye û karê keyepelê PENe û aktîvîteyê bînî tetkîk kerdîy û nê warî de qerarê ke hewce kerdêne girewtîy.

Kongre qismêkê bînî yê karê xo de Dr. Zerdeşt Haco bi zafaneyê rayan tekrar sey serekê PENa Kurd weçîna.

Hewna, komîteya verêne ra xanim Bêrîvan Doskî û birêz Kakşar Oremar û di endamê bînî birêz Mîrhem Yigît û Bedredîn Salih sey endamê komîteya îdarekerdoxe û di endamê neweyî, birêz Necîb Balayî û Ebdula Hîcab zî sey cagirewtoxê komîteya îdarekerdoxe weçînay.

Peynîya karê kongre de, endamê beşdarî pêşnîyazê xo seba karanê îstîqbalê komîteya îdarekerdoxe ya newîye kerdîy.

Kongre, peynîya karê xo de nuqtayanê cêrinan ser o qerar da:

  • Ziwan bingehê nasnameya miletan o, coka qedexekerdişê ziwanê neteweyêk ganî sey “cînayetê vera merdîmîye” bêro nas keredene û no cînayet vera nasname û kesayetîya şarê kurdî êdî bêro vindarnayene.
  • Ziwanê kurdkî heme mintiqayanê Kurdîstanî û cayanê ke zêdetir kurdî tede ciwîyenê de ganî bibo ziwanê resmî û ganî heme merheleyanê perwerde û musnayîşî de bêro şuxulnayene.
  • Navenda PENa Kurd keyeyo muşterek yê heme nuştoxanê kurdan o, ê ke qelema înan xizmetê ziwan û edebîyatê kurdkî de ya.
  • Seba xurtkerdişê xebata Navenda PENa Kurd heme nuştoxanê kurdan ra yeno waştene ke bi beşdarîya xo xebata edebîyat û ziwanê neteweyî û têkilîya xo edebîyatê neteweyî reyde bihêztir bikerê.
  • Navenda PENa Kurd heme dezge, rêxistin û kurdanê desthelatdaran ra wazena ke ziwanê kurdkî bikerê ziwanê sereke yê kar û peywendîyanê xo.
  • Navenda PENa Kurd heme nuştox, rojnameger, heme dezgeyanê çapemenîye, weşanxane û keyepelanê Înternetî ra wazena ke weşana xo de girêdayeyê peymana roşinvîrîye bê.
  • Kongreya 7. ya Navenda PENa Kurd roşinvîra kurdan xanima Sînemxan Bedirxan sey serekê rûmetî ya Navenda PENa Kurd weçînaye.

Komîteya Îdarekrdoxa Pêroyî ya Navenda PENa Kurd

Na xebere 1313 rey wanîyaya
No nuşte hema şîrove nêbîyo.