zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
11 Tebaxe 2010 Çarşeme 09:40

Başur de Dewaya Qaçaxîya Petrolî

Xebere: Zazakî.NET

Serekê Kurdîstanê Başûrî Mesut Barzanî derheqê rojnameyê partîya Goranî Rojnameyî de mehkeme akerda û yew mîlyon dolar tezmînat wazeno.

Rojnameyê lîderê hereketê Goranî Noşîrvan Mistefayî Rojname Mesut Barzanî rexne kerdbi ke qaçaxîya petrolî ya bi Îranî ra xugî gêno. Naye ser o Mesut Barzanî roja 25.07.2010 de mehkemeya Hewlêrî de dewaya tezmînatî akerde û yew mîlyon dolar waşt. Mehkemeya verêne roja heştê tebaxe de dest pêbikerd.

Rojnameyê lîderê hereketê Goranî Noşîrvan Mistefayî Rojname nusxeya xo ya roja 20 temmuze de yew xebere vila kerde û da zanayîş ke mîyanê îdareyê kurdan û îdareyê Îranî de qaçaxîya petrolî bena. Netîceyê na qaçaxîye de PDK û YNK bi mîlyonan dolar pere kar kenê.

Rojnameyê New York Timesî zî aşmêk verê cû bale antbî ser ke her serre sînorê Îran-Îraqî de, mintiqayê koyan ra bi mîlyonan dolar qaçaxîya petrolê xam û û petrolê viraşteyî bena. New York Timesî îfade kerdbi ke karê petrolê qaçaxî mîyanê şîrketanê ke nêzdîyê PDK û YNK de yê pare beno. Û hukmatê Bexdadî ra zî tayê karbidest û polîtîkerî mîyanê na qaçaxîye de yê.

Karbidestê PDK Fazil Mîranî waşt ke mudirê karê nuşteyan yê Rojnameyî Azad Çalak û muxabîr Sîrvan Reşîd ke na xebere amade kerda, vejîyayîşê înanê teberî welatî qedexe bibo.

Keyeyê Teqîbkerdişê Azadîya Çapemenîye ya Îraqî zî dayo zanayîş ke na dewa roja heştê tebaxe de Hewlêr de dest pêkena û va: “Tarîxê Îraqî de seba xeberê rojnameyêk tezmînato tewr zêde yo ke yeno waştene. Ma wazenê ke gerre apey bêro girewtene. Çunke no hende tezmînat do karê rojnamegrîye ser o tesîrêko negatîf bikero.”

Mudirê karê nuşteyan yê Rojnameyî Azad Çalakî beyanatê ke dayo AFP de vano: “Derheqê îdîaya xebere de destê ma de delîlê ke qîm kenê estê. Heto bîn ra muxabîrê AFP zî verê cû dabi zanayîş, ey dîyo ke aşma temmuze de serê rayîrê Başmaqe de qasê 150 tankerê ke petrolê qaçaxî kirişnenê, vinderte bîyê.

Na xebere 1404 rey wanîyaya
No nuşte hema şîrove nêbîyo.