Badê Çewres Serran Maseyî Qedênê

Pisporê YN (Yewîyîya Neteweyan) danê zanayene, eke seydarîya maseyan bi hawayêko îlmî newe ra tenzîm nêbo, mîyanê çewres serranê vernîya ma de do okyanusan de maseyî nêmanê.

Şêwirmendê taybet yê “Daîreyê Teşebusê Ekonomîyê Keskî” yê Programê Dorûverî yê Yewîyîya Neteweyan Pavan Sukhdevî şaristanê New Yorkî de beyanatê ke da rojnamegaran de, da zaneyene ke ganî seydarîya maseyan newe ra û bi hawayêko îlmî bêro tenzîm kerdene. Çunke netîceyê seydarîya bêplan û zêdîye de hetanî serra 2050î do okyanusan de maseyî nêmanê.

Pisporê ekolojî û bîyoçeşîdîye Pavan Sukhdevî va, “Eke texmînê cîya-cîyayî ke ma kerdê rast vejîyê, mîyanê çewres serran de êdî maseyî nêmanenê.”

Pisporê YN seba ke vernî ro qedîyayîşê maseyan ke sey “felaketê tebîetî” name kenê bêro girewtene, ganî îdarekerdoxê dewletan seba seydarîya maseyan mintiqayan virazê û tedbîr bigîrê.

Pisporê NY vanê “Dezge û sazîyê ma, dewletê cîhanî eke biwazê, şênê vernîya nê felaketî bigêrê. Nika qasê 30 dewletî nê warî de UNEPî reyde hemkarîye kenê la ganî dewletê bînî zî polîtîkaya xoya dorûverî newe ra tenzîm bikerê.”

Pisporê YN danê zanayene, kêmîyayîşê rezervê maseyan hem felaketê tebîetî xo reyde ano hem zî mîlyarêk merdim çimeyê debare ra mehrum beno. Heto bîn ra, çinbîyayîşê maseyan hetê werd û weyebîyayîşî ra zî problemanê zaf cidîyan xo reyde ano.

Raporê YN derheqê kêmîyayîşê maseyan de do emser bi hawayêko biteferuat seba rayaumûmî eşkera bibo.