zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
16 Êlule 2010 Panşeme 21:50

Amerîka de Grûbêka Fundamentalîste Waşt Quran Biveşno

Xebere: Zazakî.Net

Amerîka de yew grûba fundamentalîste waşt roja 11ê êlulê yew Quran biveşno.

Grûbêka fundamendalîste bi nameyê “Dove World Outreach Center” eyaletê Florîda ya Amerîka de waşt roja yadkerdîşê hêrîşê 11ê êlulê bibo “Roja Mîyanneteweyî ya Veşnayîşê Yew Quranî”. Labelê serekê DYA Barak Obama û gelek karbidestanê Dewletanê Yewbîyayanê Amerîka na pêşnîyaze rê qayîl nêbîy. Serek Barak Obamayî va, karode nîyanên qet nêşîkîno ro tore û edetanê Amerîka. Û dima dewam kerd va, no kar Amerîka de beno sebebê dişmenîya îslamî. Teber ra kî beno sebebê netîceyanê xiraban. Nê qerarî ra dima heyatê eskeranê DYA ke Îraq û Efxanîstan de yê, keweno tehluke. Barak Obamayî va, tersê mi o yo ke no kar heto bîn ra kî destê El-Qaîde xurt bikero û şaristananê Ewropa û Amerîka de organîzekerdîşê hêrîşanê întîxarî asan bikero.

Vatîkan û xeylê dewletanê bînan kî qerarê grûba “Dove World Outreach Center”î şermezar kerd. Naye ser o, berpirsîyarê na grûbe Keşe Terry Jonesî badê ke gelek cayan ra, bitaybetî hetê wezîrê parastinî yê Amerîka Robert Gatesî ra ame îqaz kerdene, fek veşnayîşê Quranî ra verada. Keşe Terry Jones û melayê cematê muslumanî yê Florîda Mehemed Misrî pîya yew kombîyayîşê çapemenîye viraşt û da zanayene ke fek veşnayîşê Quranî ra veradayo. Seba ke keşe Terry Jonesî fek veşnayîşê Quranî ra verada, Mela Mehemed Misrî o tebrîk kerd.

Na xebere 1509 rey wanîyaya
No nuşte hema şîrove nêbîyo.