zazaki.net
17 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
29 Çele 2012 Yewşeme 11:10

Almanya û Dolmîşê Licê

Sebahedîn Ozan ASLAN

Rocêke komêy ke şanoyî go Dîyarbekir ra şorê Almanya turneyê kaye. Serekê komêy ê şanoyî vano go rocê şemîy, saete 9.00 de her kes verê kêy cînan ra dolmîşê Licey bêro hawa alanî, her kes vano temam û benê vila. Zaf şino tay şino rocê şemîy yeno. Dolmîşê Liceya ku go şanogeran verê kêy cînan ra bigîro, tekelê cay teqeno.

Şofêrê dolmîşe telefonê serekê şanogeran keno vano:

- Keko hal û mesele anekî ya. Tekelê dolmîşe teqa, ez o bikoy herey. Ti ro embazanê xo bigeyre vace wa haya cînan tera bibo ez o herey bêrî.

Serekê şonogeran vano:

- Temam, ez o xebere bidî embazan.

Û serekê şanogeran bi telefon ro heme embazanê xo gêreno, la tenê  telefonê hebêke embazî cînan çinî yo nêşkeno ro ê bigeyro.

Serekê şanogeran xo de vano:

- De ma gava herey mendî, do ew zî şoro kê xo, ma go şin ê kêy ci ra bigîrin.

Nameyê embazê şanogeran ke telefonê cê çinî yo Mesût o. Mesût verê kêy xo de serê ray de hêvî dolmîşe wo. Hay û hêvî cê tera çinî yo ke dolmîşe tekelê caye teqawo. Zaf şino tay şino, Mesût awnêno dolmîşê ke ser o Licey nûsena hamî. Serekê cînan vatbî ma go bi dolmîşê Licey şima bigîrin. Mesût vano qey dolmîşa ku yena, dolmîşa înan gêna a wa. Dolmîşe yena, Mesût destê xo keno ra, dolmîşe senî vîndena, muawinê dolmîşe beno peya, hema beno çenteyê Mesûtî ro arzeno serê dolmîşe. Mesût zî beno espar, qoltixa vernîyê dolmîşe. Dolmîşe kona ray.

Mesût awnêno peynî xo ra embazê cê jo çinî yo, şofêrî ra perseno vano:

- Ça yê embazê ma, nêyameyê?

Şofêr vano:

- Kam, ambazê to kam ê keko?

Mesût vano:

- Yaw xalê Meheme, Emîn embazê ma yê komê şanoyî.

Şofêr vano:

- Keko şano çî yo, ez fam nêkena, ti şinê ça?

Mesût vano:

- Yaw komê ma yê şanogeran ma şinê Almanya tûrneyê kaye.

Şofêr vano:

- Keko Almanyaya çî, ma şinê Licey, Almanya ça Licey ça.

Mesût hêrs beno vano:

- Şima çî rê sere de nêva ma şinê Licey.

Şofêr vano:

- Ma to nêdî serê dolmîşe de Licey nûşte bi.

Mesût vano:

- Ê ma serê dolmîşa ke go ma bigirotêne de zî Licey nûsayayne.

Mesût awilî hêrs beno la dim ra fam keno ke xeletîya ê zî esta, dolmîşe vindarneno.

Mesût şofêrî ra vano:

- Banî keko, xeletî him mi ra wa him to ra wa, de keremê xo ra ti bi telefonê xo ro embazanê min bigeyre, vace ez hûnî ya filan ca de.

Mesût numreyê embazê xo dano şofêrî. Şofêr telefonê serekê şanogeran keno, vano hal û mesele anekî ya, ma ew hûnî yo dolmîşe ra kerd peya, şima filan ca ra ê bigîrê. Mesût çentey xo dolmîşe ra gêno û hevî embazanê xo vindeno. Embazê cê yenê Mesûtî ra hêrs benê, Mesûtî benê xo mîyan de ci rê telefûnêke gênê û şinê hawa alanî konê ûçax şinê Almanya.

Na xebere 1561 rey wanîyaya
ŞÎROVEYÎ
..
bextreş
in fek zor bi, famkerdişe tayê cumleyan de mi zehmetî dî, yanî çekuyî şinasîbî la cumleyî xerîbbî. destê nuştoxî tern bo.
29 Çele 2012 Yewşeme 12:00