zazaki.net
25 Teşrîne 2017 Şeme
Girdîya Karakteran : 12 Punto 14 Punto 16 Punto 18 Punto
31 Çele 2010 Yewşeme 12:35

Almanya de Perwerdeyê Kurdkî

[Xebere]
Zazakî.NET

Almanya de talebê perwerdeyê kurdkî qebul bi.

Şaristanê Kolnî yê Almanya de seba “perwerdeyê kurdkî” muracatê kurdan hetê Mudirîyetê Perwerdeyî ra qebul bi.

Badê ke wezîra perwerdeyî yê eyaleta tewr girde yê Almanya Nordrhein  Westfalen (NRW) Barbara Sommer beyanatê xo de va “Yew doman neke tena qiseykerdene de eke nuştene de zî hakimê ziwanê dayka xo bo, îstîqbal de cuya xo ya meslekî û karê xo de do şansê xo zêdeyir bo. Zaf-tewirîya ziwanan dewlemendîyêka kulturî ya û Ewropaya ke gird bena de globalîye nîşan dana.” Kurdan seba perwerdeyê kurdkî muracatê Mudirîyetê Perwerdeyî yê Kolnî kerd û muracatê înan qebul bi.

Qebulbîyayîşê muracatî reyde Wendegeyê Katolîkî yê Mulheimî perwerdeyê kurdkî erê kerd. Naye ser o, rojanê dişemeyan saete mîyanê 12:00 – 16.30 de hetê malimê kurdkî Mehmûd Akbayirî ra do dersa kurdkî (kurmanckî) bîyero dayîş. Wendege de “Perwerdeyê ziwanê kurdkî” do roja 02 sibate 2010 de bi hawayêko resmî dest pêkero.

Endamê Yewîyîya Mamostayanê Kurdîstanî Mehmûd Akbayir seba ke domanê înan nê îmkanî ra îstîfade bikerê, kurdê ke Mulheim û dorûverê ey de ronişenê ra taleb keno ke demeyêko kilm de muracatê ey bikerê.

Mehmûd Akbayir venga dadî û babîyanê kurdan dano û wazeno ke ganî ê derheqa ziwanî de hesas bê û vano “Ziwan îstîqbalê miletî yo. No seba însanbîyena ma yo. Gazîya mi na ya ke heme welîyê kurdî hesasî bê û grûbê winasî vêşî bibê. Vanê Koln de 40 hezar kurdî estê. Goreyê na hûmare ra zaf tayo ke tena 75 domanî perwerdeyê kurdkî bivînê. Aîleyê ma yê hesasî estê, ez înan rê sipas kena. Welîyê ma yê ke bi erebeya xo domanan anê wendege û benê zî estê.”

Enstîtuyê Kurdkî ke merkezê aye Almanya de yo zî beyanat da û va, domanê kurdan yê ke Almanya de yê, seba ke perwerdeyê kurdkî bivînê, ma seba her tewirê piştgîrîye amade yê. Enstîtuyê Kurdkî ra Fewzî Ozmenî va, “Wazena wa derheqa kitabanê derse de bo û wazena wa derheqa peydakerdişê maliman de bo, eke muracatê ma bikerê, ma bi her hawayê destekdayîşî rê amade yê.”

MURACAT SENÎ BENO?

Erzuhalê ke welîyan arêdayê (tewr tay ganî 15 wendekarî bê) ganî bidê Mudirîyetê Perwerdeyî yê cayê ke tede ciwîyenê. Eke cayo ke murcat bîyo de malimê resmî yê ke perwerdeyê kurdkî bidê peyda nêbê, seba tayînkerdişê maliman ganî tewr tay 60 yan 70 wendekarî estbê. Welîyê kurdî derheqa perwerdeyê kurdkî de şênî bi wasitaya telefonî mamosta Mehmûd Akbayirî reyde bikewê têkilîye. Tel: 0221-67117977

ALMANYA DA DERSÊ KURDKÎ

Panc eyaletanê Almanya de hetê 25 malimanê ke bi hawayêko resmî tayîn bîyê ra dersa kurdkî seba hezar ra vêşêrî wendekarî dîyena. Cayêko sey Kolnî de ke 40 hezar ra vêşêr kurdî ciwîyenê, tena semtanê sey Chorweiler, Bickendorf, Porz û Mulheimî de 75 domanî dersa kurdkî wanenê.

____________

Çime: ANF, 30 Çele 2010, Saate 08:25,  http://www.firatnews.com/index.php?rupel=nuce&nuceID=20904

Foto: http://www.dibistanakurdi.com/

Na xebere 2167 rey wanîyaya
ŞÎROVEYÎ
Kurmancî Weş Mucadele Kenê
Mela
Kurdê kurmancî seba kurdkî (kurmanckî) her war de; çapemeni, perwerde, dîplomasî, televizyon, sînema, muzîk, edebîyat, hema ti kam warê cuye vajî tede weş mucadele kenê. La kirdê ma (zaza, kirmanc, dimilî) xo rê temaşe kenê. Vanê "Armut piş ağzıma düş!" Qet xemê înan nîyo. Qismêk estê bi tirkî lome û gazindan kenê, qismêk zî estê nenganê kurdan çînenê.
31 Çele 2010 Yewşeme 12:52