AKnews Êdî bi Hîrê Ziwanan Weşane Kena

Ajansa Xeberan ya Kurdîstanî AKnews êdî tena bi hîrê ziwanan weşane kena.

Mudirê AKnewsî Bedran Ehmed Hebîbî yew beyanat da çapemenîye û da zanayene ke tîya ra pey do tena hîrê ziwanan de weşana xo dewam bikerê.

Bedran Ehmed Hebîbî beyanatê xo da zaneye ke nêzdîyê hîrê serran o ke ma bi kurdkî (sorankî û kurmanckî), erebkî, fariskî, tirkî, îngilîzkî û almankî weşane kerde û va, “Seba ke merdim hewt ziwanan de weşane bikero ganî personel û îmkanê zêdeyî estbê. Coka tîya ra pey ma do tena hîrê ziwanan de, yanî kurdkî (lehçeya sorankî), erebkî û îngilîzkî de weşana xo dewam bikerin. Ma qismê kurdkîya kurmancî, tirkî, fariskî û almankî vindarna.” Labelê badê beyanatî, seba vindarnayîşê weşana kurmanckî gelek reaksîyonî virazîyay. Beno ke naye ser o weşana kurmanckî ya AKnewsî dewam bikero.  

Ajansa Xeberan ya Kurdîstanî AKnews oktobra 2008î de bi sloganê “Ajansa Xeberan ya Kurdîstanî (AKnews) ajansêka neteweyî û xoserbîyayîye ya” dest bi weşane kerdbi.