zazaki.net
16 Tebaxe 2017 Çarşeme
Girdîya Karakteran : 12 Punto 14 Punto 16 Punto 18 Punto
05 Tebaxe 2009 Çarşeme 15:41

Wisif Hêlinij, Qelbîn de defin bi

Kurdperwero erjaye Wisif Hêlinij vizêr (23.10.2008) dewa ey Qelbînê Pîranî de defin bi.

Kurdperwero erjaye Wisif Hêlinij (Yusuf Kaymak) ke roja 16.10.2008 paytextê Fransa Parîs de netîceyê qezayêkê trafîkî de dinyaya xo bedilnaybî, vizêr (23.10.2008) dewa ey Qelbînê Pîranî de defin bi.

Cinîya ey Leyla Xanim, birayê ey Mistefa û embazê ey M. Malmîsanij û J. Îhsan Esparî cenazeyê Wisif Hêlinijî Parîs ra bi teyare ard bi Dîyarbekir. Ewro saete 09.00 de cenaze resa bi Dîyarbekirî. Nêzdîyê hezar merdimê welatperwer û namdarî meydanê teyareyan de şîy vernîyê cenazeyî.

Şêligêko qelebalix; gelek merdiman û nas û dostanê ey, gele embazê ey ê welatperwerî cenazeyê Dîyarbekir girewt berd berd Qelbîn.

Dewa Pîranî Qelbîn de, bi merasim cenazeyê Wisif Hêlinijî defin bi. Merasimê definkerdişî de M. Malmîsanijî derheqê cuyê Wisif Hêlinijî de qisey kerd.

Malmîsanijî va:

"Gelî haziran, gelî erjayan!

Şima zî zanê, merdimê erjayey leze dinyaya xo bedilnenê. Wisif erjaye bi. Nê ke ma badê ey vanê. Ma verî zî vato, ma weşîya ey de zî vato. Wisif heqîqeten merdimêko zaf erjaye bi. Û Wisifî mîyanê ma ra rew bar kerd şi.

Wisif na dewe, yanî Qelbîn ra yo. Panc serrî mektebo verên Qelbîn de waneno. Dima ra, xo rê xo vero, dano piro şino medreseyan de waneno. Zafê medreseyanê cîya-cîyayan yê Kurdîstanî de waneno. Seke kurmancê ma vanê, beno xwedîyê duwanzdeh îlman. Yanî duwês îlman waneno. La qîmê xo pê nêano. Hewna, xo rê xo vero, dano piro şino Şam. Seke erebî vanê, şino Şamê şerîf. Mi ra vatêne, vatê “Ez bi şelwalanê xo yê Qelbînî şîya heta bi Şam.”

Wisif tena, yew gede, xerîbîye de, Şam de bi ziwanê erebkî lîse waneno, mezûn beno. La qîmê xo pê nêano. Uca ra zî dano piro şino Misir. Paytextê Misirî Qahîre de, unîversîteya namedare El-Ezher de waneno. Wisifî mi ra vatêne, vatê “Yew ferhengê erebkî estbi, mi o ferheng ezber kerdibi. Sinife de ge-ge xoceyê ma çî persaynî. Ereban nêzanayne, mi cewab dayne. Xoceyê erebî vatêne 'Biewnî, no ereb nîyo la şima ra holêr erebkî zano!'”

Badê ke El-Ezher ra mezûn beno, nara şino Firansa, şino Parîs. Uca zî master keno. Wisifî zaf baş bi erebkî û franskî zanayne.

Ewropa de ma zaf pîya mendî. Ge-ge ma xerîbîye de derdê xo yewbînî rê qisey kerdêne. Wisifî zaf tenêtî, tengane û feqîrî dîybî. La Parîs de halê ey weş bibi. Maldar bibi.

Reye esta tayê merdimî ke halê înan weş beno, welatê xo, miletê xo kenê xo vîrî ra. La Wisif wina nêbi. Nê koyî, nê dere û qotî, nê cayî heme vîrê ey de bî. Nameyê nê heme cayanê dorê dewa xo zanayne. Rojêk mi va, “Wisif, no Hêlin çî yo?” Va, 'Hêlin nameyê koyêkê dewa ma yo. Mi ê koyî de zaf dewar çerenayo. Ez ê koyî ra zaf geyraya.” No koyo ke aseno, nameyê ey Hêlin o.

Wisifî het a çîyo ke tewr çin bi, quretî bî. Wisifî qet nêzanayne quretî çîy a. Nefqicek bi, fedakar bi. Însanêko zaf fedakar bi.

Werek bi ê pîy û may, werek bi Qelbînî ke yew însano winasî ardo dinya. Ma heme pê Wisifî îftîxar kenê, wa Qelbîn zî pê Wisifî îftîxar biko ke yew merdimo winasî mîyan ra vejîyayo ke ewro hende merdimî cayanê cîya-cîyayn ra, welatan ra amey bi Qelbîn.

Wa ruhê ey şad bo."

217

Malmîsanijî dima serekê beledîya Pîranî Ebdullah Akenginî qisey kerd. Ebdullah Akenginî va: Seke Malmîsanijî zî va, heqîqeten zî Wisif herrîya xo, welatê xo ra girêdaye bîyo. Çunke ê çendanê verî mi ra gireyder waştibi. Seba ke tîya, dewa xo de, Qelbîn de, herrîya xo ser o yew ban virazo. Viraştişê banî nêbi qismetê ey. La hende welatî ra ame resa bi dewa xo. Kewt verarê herrîya xo. Ame resa bi herrîya xo.

Serekê beledîya Pîranî ra dima zî, serekê şaxê DTP yê Pîranî Mistafa Dayanî qisey kerd. Ey zî va: Mi bi xo Wisif nêdîyo, ez ey şexsen nêşinasnena. La mi nuşteyê ey, şîîrê ey kovaran de dîyê. Ez ey nuşteyanê ey ra ey şinasnena. Madem ke ewro hende merdimê namdarî cayanê cîya-cîyayan ra amey resay heta tîya, aseno ke Wisif merdimêko erjaye yo, fedakar o. Ma pê merdimanê winasîyan îftîxar kenê. Ma heme embazanê ey rê sipas kenê ke wina wayîrîye ro embazê xo kenê.

Wisif Hêlinij 03.12.1954 de dewa Pîranî Qelbîn de amebi dinya. Badê ke şibi Ewropa sere ra hetanî peynî mîyanê Grûba Xebate ya Vateyî de xebetiyayne. Wisif Hêlinij beşdarê heme kombîyayîşanê standardîzekerdişê kirmanckî bibi. Çinbîyena Wisif Hêlinijî seba Grûba Xebate ya Vateyî venganeyêka zaf gird a. Çunke hetê ziwanî ra, bi taybet ziwanê erebkî ra, Wisif Hêlinij xebata standardîzekerdişê kirmanckî de elemanêko zaf muhîm bi.

Wisif Hêlinijî xo ra pey xanima xo Leyla, pî û maya xo, gelek way û birayê xo û embazê xo yê welatperwerî, embazê xo yê Grûba Xebate ya Vateyî xo dima verday û şi. Homa rehma xo ro ey biko. Wa ruhê ey şad bo. Xebata ey, fedakarîya ey veng ra nêşina.

Na xebere 1883 rey wanîyaya
ŞÎROVEYÎ
kerwa
A.karakoc
Homa cayè Mamoste è wusif cennet ku.Gani xortè xebata yi bèr aver.
13 Eylül 2009 Pazar 01:10