zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
21 Teşrîne 2009 Şeme 09:32

Pîr Şalyar (1006-1098)

Amadekar: Sidqî Hirorî

Pîr Şalyar yan Pîr Şehrîyar ke bi nameyê Pîrê Şalyarê Hewramî namdar o, pîr û pîlanê dînê yaresanîyan ra yew o. Nameyê ey Xudadad lajê Camaspeyî yo. Serra 1006 de Hewraman da dadîya xo ra bîyo. Xortanîya xo de şino Lorîstan verê rayberê dînê yaresanîyan Şa Xoşênî û hîrê serrî uca maneno. Waştişê Şa Xoşênî ser o agêreno bi Hewraman û uca bawerîya yaresanîye vila keno. [Pîr Şalyar] zanistê kelam û mentiqî de pispor beno, serra 1098 de merdo. Tayê estê, ey sey rayberê zerdeştîyan o tewr peyên yê Hewramanî name kenî.  

Pîr Şalyarî kitabêkê şîretan bi nameyê “Marîfeto Pîr Şalyar” bi kurdkîya goranî xo ra pey verdayo. [No kitab] hewramîyan het zaf pîroz o. [Hewraman] de tayê estê vanê seba ke îslamîyet badê ey ra resayo bi Hewraman, [coka no kitab] Quranî ra kehenêr o. Beyt, bend û şîretê Şalyarî ke nê kitabî de estê fekê şarî ra ameyê arêdayîş û nuştiş. Tahmê zerdeştîye şîîranê Pîr Şalyarî de serdest o. [K]urdkîya ey erebkî[ya ey] ra hîna pank a. Na yewe goreyê fikrê tayêne ra yena na mana ke heyamê ey de dînê îslamî [hema] nêresabi mintiqaya Hewramanî.

Pîr Şalyar şarê Hewramanî het sey welî û merdimêko wayîrê keramatan şinasîyêno û goya ey zaf nêweşî weş kerdê û ziwan visto fekê lalan. Hewraman de roşanê Pîr Şalyarî verê mezelê ey de nîmeyê wisarî û nîmeyê zimistanî de, her reye hîrê rojî, yeno kerdiş.

____________

Amadekar: Sidqî Hirorî

Çimeyî:
- Mêjûy Edebî Kurdî, Dr. Marif Xeznedar, bergê yekê, weşanxaneya Aras, Hewlêr, 2001.
- Cewad Mifred Kehlan, http://far-hang.blogspot.com/2007/01/blog-post_28.html
- Hewraman û Pîr Şalyar, http://www.xoshawisty.mihanblog.com/post/61

___________

Not: No nuşte keyepelê Kulturname ra gêrîyayo û hetê Roşan Lezgînî ra kurmanckî ra tercumeyê kirmanckî bîyo.

Çime: http://www.kulturname.com/?p=2510#more-2510

Na xebere 4594 rey wanîyaya
No nuşte hema şîrove nêbîyo.