zazaki.net
25 Teşrîne 2017 Şeme
Girdîya Karakteran : 12 Punto 14 Punto 16 Punto 18 Punto
04 Nîsane 2013 Panşeme 16:10

Kombîyayîşê 23. yê Grûba Xebate ya Vateyî Temam bi

Xebere: Zazakî.Net

Grûba Xebate ya Vateyî ke 1996 ra nat bi hawayêko daîmî tespîtkerdişê qaydeyanê gramerî, rastnuştiş û standardîzekerdişê çekuyan û termanê kirmanckî (zazakî) ser o xebitîyena, reya 23. Dîyabekir de kom bîye û kombîyayîşê xo temam kerd.

Babeta kombîyayîşê 23. qismêk nameyê heywanan û termê ke heywanan ra eleqedar bî.

Grûbe roja 01.04.2013 de Dîyarbekir de Parka Sumerî, odaya kombîyayîşî ke hetê beledîyeya Dîyarbekirî ra texsîs bîya de dest bi kombîyayîş kerd, roja 04.04.2013 de kombîyayîşê xo temam kerd. Mesrefê otele û werdî Şaredarîya Rezan a Dîyarbekirî da. 

Roja verêne ya kombîyayîşî saete 13:30 de wendekarê ke Unîversîteya Artuklu de beşê malimîya dersa weçînita ya kirdkî (zazakî) de wanenê beşdarê kombîyayîşî bîyî û qasê saet û nêm grûbe reyde suhbet kerd.

Nê kesî beşdarê kombîyayîşê 23. bîyî:

C. Z. Pîranij, Cemal Aydin, Deniz Gunduz, Dogan Karasu, Haydar Diljen, Huseyîn Kulu, Îbrahîm Bîngol, J. Îhsan Espar, Mehemed Malmîsanij, Mehemed Selîm Uzun, Mehmud Nêşite, Muzafer Xeylanij, Nadîre Guntaş Aldatmaz, Netîce Altun, Nûredîn Celalî, Roşan Lezgîn, Serdar Bedirxan, Seyîdxan Kurij û Zulkîf Demirtaş

Grûba Xebate ya Vateyî reya verêne 1996 de Swêd de dest bi xebata tespîtkerdişê qaydeyanê gramerî, rastnuştiş û standardîzekerdişê çekuyan û termanê kirmanckî (zazakî) kerdo. Seba ke welat de şertî musaît nêbî pancês kombîyayîşî welatanê cîya-cîyayan yê Ewropa de kerdî. Grûbe, panc rey Dîyarbekir de, reyêke Dêrsim, reyêke Mêrdîn û reyêke zî Çewlîg de, bî heşt rey welat de kom bena.

 Grûba Xebate ya Vateyî hetanî nika nêzdîyê des hezarî çeku û termê kirmanckî (zazakî) standardîze kerdê, ancî qaydeyê gramerî û rastnuştişî tespît kerdê.

Nê xebatî heme kovara Vateyî ke 1997 ra nat daîmî weşanîyena de neşr kerdê, ancî yew kitabê Rastnuştişê Kirmanckî (Zazakî), Ferhengê Kirmanckî (Zazakî) – Tirkî û Türkçe – Kırmancca (Zazaca) Sözlük ke hîrê rey çapa hîrakerdîye weşanîyayo, kerdê xizmetê kirmanckî. Ancî çarçewaya xebata Grûba Xebate ya Vateyî de hetanî ewro gelek kitabê edebî, folklorî û ziwanî weşanîyayê.

Payvinderteyî destê çepî ra: Mehmud Nêşite, C. Z. Pîranij, Nadîre Guntaş Aldatmaz, Netîce Altun, Mehemed Malmîsanij, Haydar Diljen, J. Îhsan Espar, Nûredîn Celalî û Dogan Karasu

Ronişteyî destê çepî ra: Huseyîn Kulu, Muzafer Xeylanij, Deniz Gunduz, Cemal Aydin, Mehemed Selîm Uzun, Zulkîf Demirtaş û Roşan Lezgîn,

dsc07179.jpg

Na xebere 2578 rey wanîyaya
ŞÎROVEYÎ
selamî
mîrza ciwan
ma wazenî na gruba rumetkar kombîyayîş xo Çewlîg di zî biker. Homa şima serfiraz bikero!!!
07 Nîsane 2013 Yewşeme 23:57
zaf selamî...
Mehemed çelîkten
Înşellah yew rojo nezdî di ez zî na grûbe de ca geni
02 Nîsane 2013 Sêşeme 10:59