zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
16 Adare 2017 Panşeme 12:25

Kitabxaneyê Kongres yê Amerîka

Ferîd Îbrahîm Sevînç

Kitabxaneyê Kongres yê Amerîka, yanî bi nameyê xwu yê înglîzkî "Library of Congress" kitabxananê dinya yê tewr kanan ra yew o. Kitabxaneyêko resmî yê Amerîka yo, 1800 de tesîs biyo. 470 ra vêşêr ziwanan de 29 mîlyonî ra vêşêr kitabî, 58 mîlyonî destnuşteyî, 1 mîlyon ra vêşêr rojnameyî, 4 mîlyonî xerîteyî û 2 mîlyonî ra vêşêr zî qeydê vengî tede muhafeze benê.

Beşa Rojhelatê Mîyanênî yê Kitabxaneyê Kongres yê Amerîka serra 1962 de, hîna zaf seba Rojhelatê Mîyanênî, ancî seba welatanê bakurê Afrîka Cezayîr, Behreyn, Misir, Xezza, Îraq, Îran, Urdun, Kuweyt, Lubnan, Lîbya, Hebeşîstan, Fas, Emman, Qeter, Erebistanê Seûdî, Sudan, Surîya, Tûnis, Tirkiya, Mîreyîyê Ereban û Yemenî paytextê Misirî Qahîre de ronîyayo.

Herçî kitab, xerîte, kovar, rojname, fîlm, DVD û CDyê ke bi erebkî, tirkî, kurdkî, armenîkî û fariskî neşir benê, Kitabxaneyê Kongres yê Amerîka yê Qahîre de yenê arêkerdiş. Badê pey, uca yenê katalogkerdiş û seba Amerîka yenê şawitiş.

Xebata arêdayişê eseranê kurdkî 1920 ra dest pêkerda. Heta nika 4 hezarî ra vêşêr eserê hîna zaf bi kurdîya soranî û bi kurdîya kurmancî ameyê arêdayiş û katalogkerdiş. Qasê 100 eserê kurdîya zazakî ameyê katalogkerdiş. Ancî qasê 90 eserê kurdîya goranî zî ameyê katalogkerdiş. Eserê kurdan yê sey Şerefnameyê Şerefxanê Bidlîsî, Mem û Zîna Ehmedê Xanî, Dimdim, Siyamend û Xece, Kerr û Kulik, Yusif û Zuleyxa zî nê kitabxaneyî de estê.

_________

Eno nuşte "Newepel, hûmare 96, r. 3" de weşanîyayo.
Bê musadeyê nuştoxî û rojnameyê Newepelî yewna ca de weşanayiş qedexe yo!

Na xebere 6023 rey wanîyaya
No nuşte hema şîrove nêbîyo.