zazaki.net
22 Êlule 2017 Îne
Girdîya Karakteran : 12 Punto 14 Punto 16 Punto 18 Punto
17 Kanûne 2014 Çarşeme 20:26

Hûmara 70. ya Newepelî Vejîya

Xebere: Zazakî.Net

Rojnameyê yewin yê kirdkî Newepel ke Dîyarbekir de weşana xo dewam keno, bi hûmara xo ya 70. vejîya.

Nuşteyê edîtorî ya nê hûmare de behsê dirîtîya dewleta tirkan vera kurdkî de beno. Edîtor nuşteyê xo de behs keno ke çendeyêk verê cû serwezîrê dewleta tirkan bi heşt wezîranê xo wa ameyo Ruha de vato “Meselaya ziwanê dayke de ma okyanusan ra vîyartî tena dereyî mendî.” La eslê xo de tirkan asîmîlekerdişê kurdan de okyanus ra vîyartî tena dereyî mendê! Tam o wext de dewleta tirkan hepisxaneyan de kurdkî bi tewirêna newe ra qedexe kerde. Edîtor bale anceno sewbîna nimûneyan ser û vano: “… heq dayo, vanê tutê ke sinifanê 5, 6, 7 û 8. de wanenê, sey dersa weçînita eşkenê hewte de di saetî ziwanê xo bimusê. La pratîk de seba ke kurdî nê heqî ra îsdtîfade nêkerê, çi yeno vîrê înan texsîr nêkenê.

Nuşteyanê muhîman yê na hûmare ra yew derheqê tarîx û tayê edetanê Kirdaneyî de yo. Roşan Lezgînî nuşteyê xo yê bi sernameyê “Pîran de tayê edetê kirdan: Roja zîyare, Penderite, Kayê qamçî” de behsê tayê edetanê kirdan keno ke belkî heşt seserrî ra nat mîyanê kurdan de dewam kenê. Xora heta ke ma bi xo tarîxê xo yê lokalî nênusin, çimeyanê xo yê zanayîşî nêvejin meydan ma do hetê şaranê bînan ra tarîf bibin. No het ra nuşteyê winasî zaf muhîm ê.

Nuşteyanê bînan ra Aydin Baturî derûdormeyê Çewlîgî ra Kemera Veyvî û Buban dayê şinasnayene. M. Emîn Kaçanî derheqê welatê ma de vurîyayîşê mêzînê ekolojî û vîndîbîyayîşê tewirê teyran de nuşto. Muhamed Deza Baturî eşqî ser o nuşto. Şeyda Asmîn bi yew hîkaye rojname xemilnayo. Îsmet Borî hetê Çewlîgî ra yew sanike arêdaya.

Îbrahîm Beyaz, Alî Şeker, Erol Koçer û Semavî Aldemirî bi şîîranê xo rojname xemilnayo. Sevîm Aydin yew fiqra û Mujdat Gîzlîgolî zî yew lorîge arêdaya. Nê nuştoxan ra Erol Koçer û Semavî Aldemir reya verên a ke nusenê.

Sey hûmaranê verênan na hûmare de zî Nadîre Guntaş Aldatmaz werdê ma û Ehmedê Dirihî zî nebatî dayê şinasnaneye. Nînan ra teber xeberê muhîmî, xaçepers û ferhengek na hûmare de ca gênê.

Newepel garantîyê averşîyayîşê kirdkîya nuştekî yo.

Newepel zemînê averşîyayîşê kulturê wendiş û nuştişê kirdkî yo.

Newepel warê arêdayîş û arşîvkerdişê folklorê fekkî yê kirdkî yo.

Newepel mektebê perwerdekerdişê nuştoxanê kirdkî yo.

Newepel halînê xuliqnîyayîşê edebîyatê modern yê kirdkî yo.

Newepel biwane, bide wendiş; bibe abone, paştî bide, wayîr vejîye.

Na xebere 2410 rey wanîyaya
No nuşte hema şîrove nêbîyo.