zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
16 Adare 2014 Yewşeme 09:59

Hûmara 61. ya Newepelî Vejîya

Xebere: Zazakî.Net

Hûmara 61. ya Newepelî sey hûmaranê verênan bi muhtewayêka dewlemend vejîya. Bi na hûmare rojnameyê yewin yê kirdkî Newepelî hîrê serrê xo dekerdî linge eşte serra çarine.

Nuşteyê edîtorî yê na hûmara de derheqê sedemanê ereykewtişê kirdkîya nuştekî de tarîx ra melumatî dîyenê.

Roportajê na hûmare Alî Fuad Doguçî Mihanî Licokicî reyde kerdo. Mihanê roportajê xo de hem behsê cu û xebatanê xo keno hem zî derheqê meselaya ziwanî de fikrê xo vano. Mihanî vano: “Etîya, ê ke vanê ma kurd ê, ê ke daway Kurdistanî kenê, kêy xwu de tûtanê xwu dir, tornanê xwu dir sey mamostayê asîmîleyî, zerrî ra, bêmeaş bi ziwanê asîmîleyî xeberî danê, xizmetê asîmîleyî kenê. Ez nêzana ê senî vînenê la qaso ke ez vînena teorî û pratîkê înan jobînan nêgînê. (…) Eke anakî şoro go milete biqedyo. Alimê dinya heme vanê, mileta ke ziwanê xwu vinî kero, badê vîst û panc heta pancas serrî a milete bena vinî. Ewropa de ez rast nîyamîya ke ferdêke jobînî dir yan zî keye û malbatê xwu dir bi ziwanêkew bîn xeberî bido. Fînî, erebî, tirkî… Heme miletan ra, bê xêrcê kurdan ku bi tûtanê xwu dir bi ziwanêkew xerîb xeberî bido. Ez di ê welatî (Swêd) de hema rastê ferdêke zî nêhamîya ku bê xêrcê ziwanê dayîke, bi ziwanêna tûtanê xwu dir xeberî bido.”

Na hûmare de di şîîrê klasîkan ra yewe yê Mehdî Özsoy a, a bîne yê Mihanî Licokicî ya. Sey hûmara verêne na hûmare de ancî Murad Murxan û Hemîd Hozanî bi çaraneyan eşto têver. Çilkanîyê Ulyanî û Muhamed Deza Baturî zî her yewî yew şîîre nuşta. Yew zî Alî Aydin Çîçekî Cemal Sureya ra tercume kerda.  

Na hûmare de cinîyan ra Songul Duzgun û Şermîn Kanhan her yewe yew nuşte nuşto. Nadîre Guntaş Aldatmaz werdanê ma ra viraştişê “zirfetî” tarîf kerdo. Hacer Petekkaya yew sanike arêdaya, Fîruzan Demir û Mulkîye Ongul zî her yewe yew şîîre nuşta. Nînan ra Songul Duzgun û Fîruzan Demir reya verên a ke nusenê.

Mutlu Can nuşteyê xo de behsê seba kirmanckî dayîşê waştişnameyî bi dezgeyê temsîlkarîya Unescoyî yê Anqara keno. Wehdet Sîwanij Almanya ra behsê yew kayê tîyatroyî keno. Îsmet Borî yew hîkayeya kilmeke, Ehmedê Dirihî yew fiqra û nameyê nebatan, Mehmed Yergînî yew mesela tirkî ra açarnaya, Roşan Lezgînî zî yew kayê ma nuşto.

Nînan ra teber ancî xaçepers, ferhengek û xeberî na hûmare de ca gênê.

Na xebere 1761 rey wanîyaya
No nuşte hema şîrove nêbîyo.