zazaki.net
22 Gulane 2017 Dişeme
Girdîya Karakteran : 12 Punto 14 Punto 16 Punto 18 Punto
25 Sibate 2015 Çarşeme 21:56

Hûmara 43. ya Vateyî Vejîya

Xebere: Zazaki.Net

Hûmara 43. ya kovara Vateyî bi muhtewayêka dewlemende vejîya. Nuşteyê edîtorî yê na hûmare de behs beno ke redaksîyonê kovara Vateyî vurîyayo. Tîya ra pey, Nuredîn Celalî, J. Îhsan Espar û Nadîre Guntaş Aldatmaz kovare amade kenê.

Na hûmare de Ehmed Kirkanî derheqê roşanan de yew analîz nuşto û hetê vîrê komelkî ra roşanî analîz kerdê. Nadîre Guntaş Aldatmaz roşanê Gaxanî analîz kerdo. Yew nuşteyê analîzî yo muhîm zî Mehmed S. Kaya û Memo Darêzî meselaya standardîzekerdişê ziwanî de nuşto û nê hetî ra norveçkî û kirdkî pêveronayê. Vanê “wexto ke zaf dîyalektî prosesî standardîzekerdişî ziwanî de temsîl benî, na yew hesasîyeto ortax yê komelî xurt kena, vernîyê dibendî û problemanî ziwanî, sey problemê ke Norweç de hema zî çareser nêbîyê û ewro zî norweçijî pê meşgul benî, gena. Proseso winayin (nîyanên) û çarçewaya wina hîra de zafanê şarî ziwanî nuştişî (ziwano ke standardîze beno) sey ziwanî xo û sey nasnameyî xo vîneno û nê ziwanî rê wayîr vejîyeno. Bi no rayîr ra merdim eşkeno komelî kirmancan (zazayan) de bendanê ortaxan bihêz bikero û seba ziwanî nuştişî yê hemparî yew zemîno muşterek peyda bikero.

Mehmed Selîm Uzunî derheqê Ehmedê Xasî û mewlidê ey de nuşteyêko derg nuşto. Mutlu Canî derheqê kitabê Mehmed S. Kayayî “Kurdê Zazayî” ke înglîzkî ra tercumeyê tirkî bîyo û bi nameyê “Zaza Kürtler” Weşanxaneyê Rûpelî ra çap bîyo ser o nuşto.  

Na hûmare de hîrê roportajî estî; Seyîdxan Kurijî resam Seîd Bazencîrî reyde, Aydin Batur derheqê veşnayîşê dewan de Mehmudê Hecî reyde û Alî Aydin Çîçekî zî Xidirê Başî reyde roportaj kerdo.

Ehmedê Dirihî Derdê Mîran ke tarîxê kirdan de cinîyêka namdar a, daya şinasnayîş û derheqê meselaya herbê Şêx Seîdî de yew cigêrayîş kerdo. Akman Gedîkî budelayanê Gimgimî ser o nuşto.

Şîîrê na hûmare Xecê, W. K. Merdîmîn, Murad Aygun, Bedrîye Topaç, Newzat Valêrî û Hafiz Ehmed Turhalli nuştê. Serdar Bedirxanî tayê îdyomî, Şahîn Kurkçuyî Sêwregi ra çend estanikî, Munzur Çemî hetê Dêrsimî ra tayê kayî û Turabî Kîşînî yew mesela arêdaya, B. Şîlanî zî fiqrayî nuştê.

Na xebere 2197 rey wanîyaya
No nuşte hema şîrove nêbîyo.