zazaki.net
19 Tebaxe 2017 Şeme
Girdîya Karakteran : 12 Punto 14 Punto 16 Punto 18 Punto
16 Oktobre 2012 Sêşeme 01:08

Hûmara 39. ya Newepelî Vejîya

Xebere: Zazakî.Net

Hûmara 39. ya rojnameyê safî kirdkî Newepelî vejîya.

Nuşteyê edîtorî yê na hûmare de behsê rewşa rojnameyî beno. Edîtor nuşteyê xo de badê ke behsê ardimê ke seba rojnameyî bîyê keno, dima vano “Eke yew cayê ma estbo, ma do xebata atolyeyan bidîm dest pêkerdene. Mesela, tewr tay ma do yew gruba wendişî, yew gruba nuştişî, yew koma muzîkî, yew koma tîyatroyî awan bikîm. Parî ra nat bî hewt rey ma kurs danê. Labelê ma şinê komelanê bînan de danê. Eke cayê ma estbo ma do cayê xo de bi hawayêko daîmî nê kursî bidîm. Nê mumkin ê, ma eşkenê bi rehetî nînan bikîm. Ma do cayê xo bikîm yew merkezê kulturî ke tede tena huner, edebîyat û kulturê kirdkî (zazakî) geş beno. Kirdê (kirmanc, zaza, dimilî) ma tede kom bibê, şêwr û mişawireyê xo bikê. Ma rê yew ca ferz o…

Ma miletêko bêdewlet ê, ma bindest ê. Tu xeyrê dewleta tirkan ma rê çin o. Ma mecbur ê ke ziwan, huner, edebîyat, kultur û nasnameyê xo yê neteweyî xo rê bi xebata xo ya sivîle aver biberîm. Sewbîna çareyê ma çin o. Sewbîna rayîr ma ra nêaseno.

Nuştoxê neweyî yê na hûmare Hacer Petekkaya, Mistefa Egîn û Ozan Kilinç ê. Hacere mintiqaya Çêrmuge ra yew sanike arêdaya, Mistefayî yew şîîre nuşta û Ozanî zî yew mesela nuşta.

Murad Canşadî nuşteyêk derheqê rîwayetê ke vanê Şêx Seîd û Seyîd Rizayî Dêrsim de yewbînan dîyo yan ney de yew nuşte nuşto. Bedrîye Topaç û Şeyda Asmîn zî her yewe yew nuşteyo estetîk nuşto. Zerîn Azrawa derheqê çirîsijanê Çewlîgî de yew nuşte nuşto. Mujdat Gîzlîgolî kitabê Bedrîye Topaç Berê Sûrî ser o yew nuşte nuşto. Umer Faruq Ersozî yew şîîre nuşta.

Ancî Şihab Zinar, Nîzamedîn Ozoglu û Rohelat Aktulumî zî her yewî yew nuşte nuşto. Nînan ra teber gelek xeberê muhîmî, ferhengek, nameyê nebatan û xaçepersî na hûmare de ca girewto.  

Newepel biwanîn, bidîn wendiş.

Bibîn abone, Newepelî bidîn ciwînayîş.

Têkilî: newepel@hotmail.com

Na xebere 1426 rey wanîyaya
No nuşte hema şîrove nêbîyo.