zazaki.net
24 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
05 Temmuze 2013 Îne 13:02

Doktoran Bi Kurdkî Sond Wend

Xebere: Enwer Yilmaz

Hewteyê vîyarteyî de hetê Odaya Tebîban a Amedî û qolê wendekaranê tibî ra merasîmê mezunîyetê alternatîf yê tibî virazîya. Merasîmê mezunîyetê wendekaran de çîyo tewr balkêş bi kurdkî wendişê sondê Hîpokratî bi. Zarawaya kurmancî û zazakî de sondê Hîpokratî merasîm de ame wendiş. Derheqê aktîvîte de serekê verên yê Odaya Tebîban û serekê Komela Çewlîgijan Dr. Şemsedîn Koçî melumat da û îzeh kerd ke înan bi no qeyde raya verêne sondê Hîpokratî bi zazakî dayo wendiş.

Şemsedîn Koçî derheqê xebate de îzeh kerd ke Hîpokrat, heme dinya de ronayoxê îlmê tibî yê pozîtîfî yo û vat, “2.500 serrî verê cû yanî verê mîladî serra 460 de Hîpokrat ameyo dinya. Semedo ke tib bibo perçeyêkê îlmî, xebate kerda. Hîpokratî vato merkezê fikrî qelb nîyo mezg o. O wext ra nat heme hekîmî pê wendişê sondê Hîpokratî game erzenê mîyanê meslegî. Hekîmî tedawîya nêweşanê xo de gere ferqê dîn, ziwan, nijad nêkerê. La ma ewnênî tayê hekîmî heqê nêweşan wenê û kişta nêweşan de ney, kişta dewletan de ca gênê.

Dr. Şemsedîn Koçî bale ante vînayîşê sihetî yê tirkîya ser û vat, “Tirkîya de bi ziwanê dayîke xizmet, muayeneyê nêweşan, muayeneyê edlî de îşkence û babetan sn. de îhlalê heqê merdiman esto. Sebebê naye zî kesê ke sondê Hîpkratî wanenê bi mantelîteya ê sondî hereket nêkenî.” Şemsedîn Koçî da zanayîş ke wexto ke hekîmî game erzenê mîyanê meslegî lazim o ke bi ziwanê dayîka xo sondê Hîpokratî biwanê û wina dewam kerd: “Yeno zanayîş ke UNESCOyî zarawaya zazakî ser o xebatêk kerda û va zazakî ver bi vîndîbîyayîş şina. Naye ra sondê Hîpokratî reya verêne bi kurdîya zazakî yeno wendiş.” Dr. Şemsedînî îzeh kerd ke cografyaya kurdan de zazayî wayirê nufusêko muhîm ê û wina va: “Semedo ke zazayî yew xizmeto baş û raşt bivînî, her çî ra ver qedexekerdişê ziwanî ke înan ser o beno gere bêro wedartiş. Seserra ke ma hê tede seserra demokrasî, heqê merdiman û azadî ya, nê şertan de semedê ciwîyayîşê ziwanî wa her kes mucadele bido. Ziwanî çi rey nêbenî sebebê perçebîyayîş û dîjbîyayîşî.”



Dr. Şemsedînî dewamê qiseykerdişê xo de wina va: “Nê welatî de her îdarekere newe felsefeyê zafrengîye ser ney, feslefeyê yewtîpîye ser hereket keno û wazenê pê nê sîstemî şarî îdare bikerê. Ê ke çar serran de Unîversîteya Dîcle de Fakulteyê Tibî ra mezun benê, merasîmê mezunîyetê alternatîfî virazenê. Emser 82 kesî beşdarê merasîmê mezunîyetî bîyî, (alternatîf =56, yê fakulte =26). Nizdîyê se ra 70 kesî rewşa unîversîte ra memnun nîyê.”

Dr. Yusuf Dener: “Ziwanê dayîke her warî de yeno qiseykerdiş.”

Dr. Yusuf Dener ke unîversîte ra mezun bîyo û sondê xo bi zazakî wend zî na mesela ser o hem nameyê xo hem zî nameyê hevalanê xo ser o qisey qerd û va: “Mîyanê şarî de ma doktorî gereke rola rayberîye bikerî. Ma gere roja xo de raştîyan bimojnîm şarî. Meseleya ma zazayan na ya ke, ma cuya xo de, edebîyat û hunerê xo de yanî semedê averşîyayîşê ziwanê xo çîyanê muhîman de ziwanê xo nêşuxulnenê. Ma ewro bi reng û ziwanê xo merasîmê mezunîyetî de sondê hekîmî wend. Ma pê na hereket a,  ma mojna her kesî ke ziwanê dayîke her war de yeno qiseykerdiş. Ma bi na helwêsta xo ya xosere mîyanê şarî de yew cîyabîyayîş vet meydan û ma bawer kenê ke do no hereket dewam bikero.
_____________
Çime: Verroj, Hûmare 60, r. 5

Na xebere 2884 rey wanîyaya
No nuşte hema şîrove nêbîyo.