zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
25 Adare 2011 Îne 13:25

Yewîya Kurdan

Murad Canşad

Kam ke zîyadêrî behsê çîyêk keno, timûtim muhîmbîyayîşê ê çîyî îfade keno; beno ke nîyetê xo qet pê çin o. Qet ê çîyî nêwazeno.

Tayê merdimî estê, vanê exlaq, des exlaqî fek ra perrenê. La ma piro ewnênê ke qet eleqeyê xo bi exlaqî çin o. Bêexlaqîya tewr pîle ê kenê. Vanê, îman û îman, la îmansistê îmansistan ê.

Kurdî timûtim behsê yewîya kurdan kenê, qalê muhîmîya yewbîyayîşî kenê.

Verî, eşîrê kurdan estbîy. Hîna zî estê. Eşîranê kurdan ge pêrodayo ge pêkerdo. Meylê xo zêde pêrodayîşî ser o bîyo.

Demê partîyan dest pêkerd, erey bikewê zî kurdan cîya-cîya partî ronay. Ferqê nê partîyanê kurdan û eşîranê kurdan hema-hema qet nêbîyo. Partîyê kurdan eşîranê kurdan ra kêmî nîyê. Eşîran ca-ca pêkerdo, partîyan o zî nêkerdo!

Kurdan vato “cebheyo mîlî” yewbînî berdo-ardo, cebhe-mebhe ronênayo. Her kesî hetê xo ser kaş kerdo. Ey vato “ez”, ney vato “ez”.

Vato, “mecliso mîlî” bîkxasa partîyanê pîlan dorme ro yewbînî fetilnayo, çerixnayo. Kes yê xo ra nêameyo war. Her partî goreyê xo meclis ronayo. Çend meclisî vejîyayê meydan. Neke yewbîyayîşê kurdan, parçebîyayîşê kurdan aver şîyo.

Meclis ra teselîya xo fişnaya, vato, “kongreya mîlî”. Nafa zî kongre ser o yewbînî berdo û ardo. Ancî ci ra teba nêvejîyayo. Neke “kongreya mîlî” kongreya partîyan ameya meydan. Sey meclisî çend kongreyî vejîyayê meydan!

Çend serrî yo ke behsê “konferanso mîlî” beno.

Çend serrî yo ke behsê ci beno la hîna gamêk zî nêameya eştene. Beno yan nêbeno, bellî nîyo. Bibo zî ancî ûsulo verên keweno kar, her partîya girde (girse) çend partîyanê qijekan ê dorûverê xo arê dana, ê xo kena. A vana yê mi rast o, na zî vana yê mi rast o.

Cebhe, meclis, kongre, konferans…

Eceba mumkin o ke mîyanê kurdan de çîyêko muşterek bêro ronayene, heme kurdî bi veng û rengê xo tede ca bigêrê? Beno yan nêbeno?

Meşte-bîro se beno dewran se vurîyeno, mumkin nîyo ke merdim ewro ra yew bi yew bizano. Ez çîyê verê çiman bivaja:

- Kurdî yewîye ra eciz benê!”

Na xebere 3544 rey wanîyaya
No nuşte hema şîrove nêbîyo.