zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
26 Sibate 2012 Yewşeme 18:18

Weqfa Îsmaîl Beşîkcî Dîyarbekir de Ameye Daşinasnayene

Xebere: Zazakî.Net

Roja 26.02.2012 yewşeme, saete 13.00 de, salona tîyatroyî ya şaredarîya bajarê girdî yê Dîyarbekirî de seba daşinasnayîşê Weqfa Îsmaîl Beşîkçî kombîyayîşêko umûmî virazîya. Serekê Hak-Parî Bayram Bozyel, parlamentera Dîyarbekirî Leyla Zana, serekê şaredarîya bajarê girdî yê Dîyarbekirî Osman Baydemîr, serekê şaredarîya Sûrî ya Dîyarbekirî Abdulah Demirbaş zî tede qasê hîrê sey roşinvîr, sîyasetkar, îdarekarê rêxistinanê sivîlan yê Dîyarbekirî beşdarê kombîyayîşî bîy.   

Verî ke kombîyayîş dest pêkero yew silayt û yew zî sînevîzyon derheqê fikr û xebata awankerdişê weqfe de ameyî nîşandayîş. Dima serekê weqfe Îbrahîm Gurbuz, muhasibê weqfe Îshaq Tepe û endamê desteyê îdareyê weqfe ra Rûşen Arslanî derheqê fikr, ronayîş, xebata ke hetanî nika ameya kerdiş de, ancî derheqê proje û ameyeyê weqfe de derg û dila melumatî day. Îshaq Tepeyî bi kurmanckî qisey kerd. Îbrahîm Gurbuz û Rûşen Arslanî bi tirkî qisey kerd.

Îshaq tepeyî qiseykerdişê xo de va, “Îsmaîl Beşîkçî bi fikrê xo, bi mucadeleyê xo rayîrê kurdan roşn kerdo. Ma bi ronayîşê na weqfe wazenê fikr û mucadeleyê Îsmaîl Beşîkçîyî mîyanê miletê ma de, hîna zaf zî mîyanê ciwanan de vila bikîn û bidîn şinasnayîş, bidîn ciwînayîş. Qasê vîst hezar kitabê ke Îsmaîl Beşîkçî şeştî serran de arê dayê, nika sey kitabxaneyê cigêrayîşî, çarçewaya weqfe de nêzdîye ra kewenê xizmetê cigêrayoxan.”

Îbrahîm Gurbuzî verî derheqê cuya Îsmaîl Beşîkçî de gelek melumat da, dima va “Ez serra 1991 ra nat şexsen Îsmaîl Beşîkçîyî şinasnena. Ey ge-ge vatên, eke ez rojêk bimrî, aîleyê mi do kitabanê mi bi kîloyan sey kaxidî biroşê. Naye ser o, ez tim fikirîyayêne. Axir ma çend embazî amey têhet û ma weqfe rona. Nika weqfe Îstanbul de ya la ma wazenê merkezê weqfe bîyarîn Dîyarbekir. Înşalah Homa emro derg bido, ma wazenê mezelê ey zî Dîyarbekir de bo.”

Rûşen Arslanî zî derheqê rewşa madî ya weqfe de melumat da, va, “Îsmaîl Beşîkçî keyeyê xoyê Anqara, yê Îskilîpî, heme kitabê xo û heqê telîfê kitabanê xo bexşê weqfe kerdê. Îbrahîm Gurbuzî Beyogluyê Îstanbulî de di dayîreyê xo bexş kerdê. Sewbîna zî gelek kesan ardimo madî dayo la seba ke ma projeyanê xo tetbîq bikîn, ma paştgirîya kurdan wazenê. Ma wazenê ke gelek kesî bibîn ardimkarê dilxwazî yê weqfe, tayê bi hetkarîya madî tayê zî bi hetkarîya entelektuelî keda xo bikî mîyanê xebata na weqfe.”

Dima serekê şaredarîya bajarê girdî yê Dîyarbekirî Osman Baydemirî qisey kerd. Osman Baydemirî va, “Fikr û vateyê Îsmaîl Beşîkçî zî hendayê radyoyê Erîwanî û medreseyanê kurdan virazîyayîşê kesayetîya mi ser o bi bandur ê. Beşîkçî Galîleoyê seserra vîstine yo. Ey bi fikrê xo roşn da tarîtîya ke ancîyaybî kurdan ser.”

Cuwa pey zî serekê şaredarîya Sûrî Abdulah Demirbaşî qisey kerd û va “Ez pêşnîyaz kena ke ma Îsmaîl Beşîkçî bikîn hemşerîyê rûmetî yê Dîyarbekirî.”

Her di şaredaran seba ke merkezê Weqfa Îsmaîl Beşîkçî bêro Dîyarbekir soz da ke mîyanê Dîyarbekirê kehenî de yew ban bexş bikerê.

Weqfa Îsmaîl Beşîkçî, roja 07.01.2012 ke roja dayîkerabîyayîşê Îsmaîl Beşîkçî de, bi beyanatêkê çapemenîye seba rayapêroyî amebî eşkera kerdene. Seba daşinasnayena Weqfa Îsmaîl Beşîkçî zî roja 14.01.2012 de Stokholm de û roja 18.02.2012 Îstanbul de yew kobîyayîş virazîyabi.

Na xebere 1619 rey wanîyaya
ŞÎROVEYÎ
beşikçi
ali firat
mi zî no daşinasnayiş teqîp kerd. zaf kef weş bîya. çunke brêz îsmaîl beşikçi seba kurdan şexsêko muhîm o, ma tekoşîna ey a demokrasi û edeletî ra hurmet kenê. la uca de yew çî bala mi ant. baydemîr demîrtaş bi çepikan qisey kerd. boya serekan înan ra yena. labelê wext ke ibrahim güçlü veciya sehne salon hema- hema bîy veng. tabi bîzeyê mi zî nêgirot ke ez o merdimi goşterî bikerî. ez tersena na waqfe ser kay bîyê kerdiş.
27 Sibate 2012 Dişeme 14:10