zazaki.net
17 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
30 Kanûne 2012 Yewşeme 09:55

Sêwregijan Wezîr Dînçer Protesto Kerd

Eki wezîr û partîya ci wazenê şardê ma rê xizmet bikerê, wa ziwanê kurdî (yanî kurmancî û dimilî), qeçekeyî ra hetanî peynîya unîversîte bikerê ziwanê perwerdeyî, wa qeçê ma bi ziwandê xo ya perwerde bibê.

Merkezê Kulturê Kurdî yê Sêwregi wezîrê perwerdeyî yê Tirkîya ke Çewlîg de va “Ma serrna zazakî sey ziwanêko cîya pêşkêş kenê” ser o ewro Sêwregi de bi tirkî û kurdkî (kurmanckî û dimilî) vilawekî vila kerdî.

Vilaweka Merkezê Kulturê Kurdî yê Sêwregi wina ya:

WA WEZÎR QISANÊ XO PEY DI BIGÎRO

Wezîrê perwerdeyê milî Umer Dînçerî, roja 12.12.2012 di Çewlîg (Bîngol) di va “Dimilî (kirmanckî/zazakî) ziwanêndo cîya yo” û serrna ma do kitabê dersa dimilî kurdî ra cîya bikerê, zey ziwanêndê cîyayî bidê wendiş.

Nê fikrê xeletî verê zî tayê “ulkucu”yanê verênan ki nika qaşo akademîsyenê Universîteya Çewlîgî yê, vatbîy. Wezîrî zî zey înan va. Nayi ser o 15 dezgeyanê sivîlan yê Çewlîgî (Bingolî) bi hawayêndo heqdar reaksîyonê xo îfade kerdê. Zey nê dezgeyanê sivîlan ki şarê dimilî (kirmanc/zaza) yê Çewlîgî temsîl kenê, ma dimilîyê Sêwregi zî nê qisanê wezîrî protesto kenê. Her kes wa bizano ki ma esla firset nêdanê ki miletê kurdî bêro parçekerdiş.

Kurdanê dimilîyan têkoşîna milî ya kurdan di rolêndo zaf gird ardo ca. Êyê ki vanê “dimilî kurdî nîya û dimilî kurd nîyê” û ma dimilîyan kurdan ra cîya kenê, ê yê dimilîyan nêsilasnenê (nêşinasnenê). Wextê xo di îdarekaranê kemalîstan zî no çî ceribnabî labirê nêşabî çîyê bikerê. Ewro zî wezîrê perwerdeyî û partîya ci AKP wazena nê çîyan bikero. La ma vanê, ma parçeyêndê miletê kurdî yê, ziwanê ma zî lehçeyênda ziwandê kurdî ya. Eki jew werzo namedê ma ser o, ma rê tarîfanê neweyan vejo, no yeno na mana ki heqareto tewr gird bi ma keno.

Eki wezîr û partîya ci wazenê şardê ma rê xizmet bikerê, wa ziwanê kurdî (yanî kurmancî û dimilî), qeçekeyî ra hetanî peynîya unîversîte bikerê ziwanê perwerdeyî, wa qeçê ma bi ziwandê xo ya perwerde bibê. Senî ki perwerdeyê bi ziwandê tirkî ya heqê tirkan o, perwerdeyê bi ziwandê kurdî ya, yanî bi kirdasî û dimilî ya zî heqê qeçekandê ma wo. La herûnda ki heqê ma bidê, werzenê kurdan pêra cîya kenê û verdanê pê. Ma kurdî êdî bi kayanê winasîyan a nêxapênê!

Wezîr Umer Dînçer, wa nê qisanê xo yê ki miletê ma rencîde kenê pey di bigîro. Fina zî wa tu kes qisanê winasîyan nêvajo û şardê ma rê heqaret nêkero.

Merkezê Kulturê Kurdî yê Sêwregi

Na xebere 1245 rey wanîyaya
ŞÎROVEYÎ
Huş be wezîr
sêwregij
Wa dost u dişmen bizano ki na dem ra tepîya ma raya raşt ra nêvijiyenê.
30 Kanûne 2012 Yewşeme 15:00