zazaki.net
17 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
04 Sibate 2011 Îne 21:10

Şaristananê Kurdan de Vilabîyayîşê Gazê Nukleerî

Xebere: Zazakî.Net

Goreyê malumatê ke Ajansa Anadolî ya tirkan dana, santlarê nukleerî yê Medzamorî yê Armenîstanî ra gazê nukleerî (nükleer sızıntı) vila beno û tesîr ro şaristananê bakurê Kurdîstanî keno.

Naye ser o pisporanê Unîversîteya Atatirkî ke Igdır de ya, dest pêkerdo şaristananê rojhelatê Tirkîya de xerîteyê radonî (gazêko radyoaktîf ke xeripîyayîşê uranyumî ra virazîyeno) kerdo. Pisporî vanê, ganî na çarçewa de sedemê qanserê pişike ke nê demanê peyênan de zêde bîyo bêro tehqîq kerdene. Seba ke tesbît bibo gelo gazê nukleerî vila beno yan ney, gelêk cayanê şaristanî de cîhazê peymawitişî ameyê bica kerdene.

Pisporan ra kesêk bi nameyê Bekir Dogan vano: “Peymawitişê winasî heme şaristananê Tirkîya de yenê kerdene la şaristananê sey Igdir, Agirî, Dêrsim, Culemêrg û Şirnexî de qet nêvirazîyênê.”

Bekir Dogan vano: “Nika ma şaristananê rojhelat û rojhelatê başûrî yê Tirkîya de dedektorê radonî tayê bînayanê resmîyan de bica kerdîy. Ma do mudetê 60 rojan de bipeymawin. Ma sedemanê qanserê pişike ke nê demanê peyênan de na mintiqa de gelek zêde bîyo ser o zî xebitênê. Hewna, ma nimûneyanê herre û awa Igdirî ser o zî analîzan kenê.” La pisporan qalê çimeyê îdîaya vilabîyayîşê gazê nukleerî nêkerd.

Santralê nukleerî yê Medzamorî ke Armenîstan de nêzdîyê paytext Ewrîwanî de yo, serranê 1970an de ameyo viraştene. Hîrine ra yewê enerjîyê Armenîstanî santralê nukleerî yê Medzamorê ra yeno temîn kerdene. La no santral erdlerzê serra 1989î de amebî gêrîyayene. Labelê serra 1996 de amebî restore kerdene û newe ra dest bi fealîyetê xo kerdbi.

Na xebere 1332 rey wanîyaya
ŞÎROVEYÎ
Vilabîyayiş!
Zazen
Verê verkan, seba zıwanê ma rê xizmetkerdişî embazan zaf-zaf sipasî.
Badê cû, sernameyê nuşte de ke sey "vilabîyayîş" ameya şuxulnayene, yeqîna, na çekûye manaya xo baş nêdana ro rûhê metnî. Ro teqdîra bi şima. Bimanên xêrî de.
11 Sibate 2011 Îne 14:38