zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
10 Adare 2011 Panşeme 09:08

Rojnameyê Kirmanckî (Zazakî) Vejîyeno

Xebere: Zazakî.Net

Yew rojnameyo kulturî yo pancês roje ke tena bi kirmanckî (kirdkî, zazakî, dimilkî) weşanîyeno, nêzdîye ra do vejîyo.

Rojname bi nameyê NewePel çarçewaya xebata Komela Ziwan Huner û Kulturî Ziwan-Komî de vejîyeno û merkezê ey Dîyarbekir o.

Destpêk de do pancês rojan ra reyê vejîyo û heşt rîpelî bo. Dima do hem rîpelanê xo bizêdno hem zî hewte ra reyê vejîyo.

Rojnameyê NewePelî roja 15 adare 2011 de hûmara xo ya verêne weşaneno. Goreyê malumatanê ke berpirsîyaranê komela Ziwan-Komî danê, rojname do hîna vêşî bi destan vila bibo û hetanî ke mumkin o heme nehîye, qeza û şaristananê ke tede kirmanckî qisey bena de vila bibo.

Kesê ke wazenê bibê temsîlkar, vilakar û aboneyê rojnameyî, hewna kesê ke wazenê nuşte, mesaj û pêşnîyazanê xo biresnê rojnameyî, şênê adresa newepel@hotmail.com rê binusê û têkilîya xo saz bikerê.

Na xebere 4961 rey wanîyaya
ŞÎROVEYÎ
valerî
newzat valêrî
NewePelê ma Kirdan xerîn bo... Kamo ki na xebat û kare de şuxûlîyo, kedkarî kerdo, ez xo bi êyan ra zaf teşekkûr kena... Ez hevîdara ki na rojname ma Kurdan rê firaz bo... Silam û rêz...
12 Adare 2011 Şeme 11:00
"Rojnameyo Kulturî yo Pancêsroje"
Roşan Lezgîn
Birêz Ehmed,
Ti şîroveyê xo de vanî, “’rojnameyo kulturî’ na îzafet raşt a? Ganî ‘rojnameyê kulturî’ nêbo, na îzafeya nameyî nîya? Keso kî zano xêrê xo ra eşkeno ma rê zî îzahet bikero.”
Ez wazena bineyke îzeh bikerî.
Ma nimûneyêk bidîn: “Ehmedo nuştox o hîrisserre”
Yan zî “Defetero sûr o qalind”
No halo sade yo.
La kam gama ke ma halê oblîkî de bişuxulnîn, ma vanê “Ehmedê nuştoxê hîrisserreyî va…”
Yan zî “Defeterê sûrê qalindî bide mi.”
Ma vato “Rojnameyo Kulturî yo 15 Roje”
No halo sade yo û rast nusîyayo. Eke ma halê oblîkî de bişuxulnîn, mesela ma vajîn “Ê rojnameyê kulturî yê 15 rojeyî biwane.” rast beno.
Wa bineyna hişê to zelal bibo. Ma vanê “Tuto pancêsroje”. Halo sade de “Tutê pancêsroje” nêbeno.
11 Adare 2011 Îne 22:17
Çimê ma roşn bo!
cemîl
Nê demê peyenan de xebatanê ke kirdkî ser o yenê viraştişî, ez bi coş û kêf teqîb kena..Nê heme çîyanê ke ez bi çimanê xo vînena, seba ma yew hewne bi û nika bîyê raştikin..Ma na rayîr de hay şima dima de yê..Homa tengasî nêdo şima..Weş û war bibin..
11 Adare 2011 Îne 20:02