zazaki.net
27 Êlule 2022 Sêşeme
Girdîya Karakteran : 12 Punto 14 Punto 16 Punto 18 Punto
17 Hezîrane 2017 Şeme 10:03

Qarûn

Roşan Lezgîn

Wexto ke behsê mal û milkê dinya beno, behsê serwet û sermiyanî beno, Qarûn yeno vîrê ma. Çimkî vanê Qarûnî ra zengînêr kes çinê biyo. Eke halê kesî zaf baş bo, şarê ma vano "Sey Qarûnî dewlemend o."

Tarîxnasî vanê Qarûn padîşayê Lîdya biyo, nameyê ey esas Krezus o, reya verîne ey pere îcad kerdo. Krezus îlahan rê lavey keno vano ez destê xwu bidî çi wa bibo zerrn. Vano qey eke zaf bibo zengîn, o do bibo mesûd zî. Zaf beno zengîn la keno nêkeno nêeşkeno bibo mesûd, miyanê dej û kederî de mireno.

Yewna rîwayet zî esto vanê Qarûn lajê apê Mûsa pêxamberî bi, zaf weş Tewrat wendêne, feqîr bi. Bi duayanê Mûsa pêxamberî îlmê kîmya musnîya ci, maden ra zerrn vet. La dima Şeytanî o xapêna, bi temamî kewt malê dinya dima…

Quran de hîrê cayan de nameyê ey vîyareno. La Sûreya Qesesî de tam behsê ey beno:

76.Qarûn helbet qewmê Mûsayî ra bi la vera înan de fexir bi. Ma hende xizînayî daybî ey ke kilîtê înan yew koma qewetine rê bîle giran ameyne. Qewmê ci ey ra va “Bi serwetê xwu fexir mebe! Bêguman Homa fexirbiyayan ra hes nêkeno.

77.Çiyê ke Homayî dayê to de axîretê xwu bigeyre la dinya ra zî nisîbê xwu mekere xwu vîr ra. Senî ke Homayî to rê îhsan kerdo ti zî hewlîye bikere û rîyê erdî de mufsîdî mewaze. Çimkî Homa mufsîdan ra hes nêkeno.”

78.[Qarûnî] va “Eno [serwet] sayeyê zanayişê mi de diyayo mi.” Qey nêzanayne, Homayî neslanê ey ra ver de, kesê ey ra qewetin ke hîna zaf serwet arêdabi û hîna zaf peyayê înan estbî helak kerdê? Û sûcdaran ra sûcê înan nîno persayiş.

79.Êdî bi zîynetê xwu vejîya vernîya qewmê xwu. Êyê ke malê dinya dima yê, va “Werrekna çiyo ke diyayo Qarûnî bidiyêne ma zî. Heqîqeten o wayirê yew serwetê pîlî yo.”

80.Êyê ke îlim diyayo înan zî va “Heyf şima rê! Înanê ke îman ardo û ‘emelo salih kenê rê mikafatê Homayî hîna xeyrin o. La êyê ke sebir kenê ra teber kes nêreseno ey.”

81.Axirî, ma o zî, ca û warê ey zî erd ro kerdî war. Senî ke êdî peyayê ey çinê bî ke ey bixelisnê, o zî ê kesan ra nêbi ke xwu bixelisno.

Na xebere 2088 rey wanîyaya
No nuşte hema şîrove nêbîyo.