zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
25 Teşrîne 2012 Yewşeme 14:16

Nuşteyê Edîtorî yê Rojnameyê Newepelî-40

Roşan Lezgîn

 

Çend serrî ra ver gama ke merdimî Google de çekuya “zaza” binuştêne, tena tayê sîteyan de çend çîyê ke dişmenîya kurdan kenê û tayê forumê ke nenganê ma çînenê vejîyayêne.

Nînan ra xaric, yew keyepelê ke Grûba Xebate ya Vateyî Swêd de awan kerdbi zî estbi la aktîf nêbi. Destpêk de çend nuşteyê ke kovara Vateyî de weşanîyaybî û çend hûmarê kovara Vateyî sey dosyaya pdf tede aliqnîyaybî. Hende. Keyepel wina cemidîyabi mendbi. Xora nika bin ra çin o.

Ma hamnanê serra 2009î de keyepelê Zazakî.Netî awan kerd û adresa www.zazaki.net ser o dest bi weşane kerd. Zazakî.Netî bi menuyê xo yê sereke kirdkî (zazakî), bi beşê lehçeya kirdaskî, bi beşê tirkî û îngilizkî reng û vengê ma kirdan torra înternetî ser o vila kerd. Qismanê sey Rojane, Meqaleyî, Roportajî, Ziwan, Cografya, Edebîyat, Bîyografî, Baxçeye Domanan, Kitabî, Galerîya Vîdeoyan û Galerîya Fotografan de bi seyan eserî estê ke sey arşîvêkê gelek dewlemendî yê kirdkî (zazakî) yê.

Badê ke Zazakî.Net kewt fealîyet û wina bi hawayêko daîmî, biîstîqrar û rojane weşana xo dewam kerde, nat û wet ra îştehê çend embazan zî abi. Va qey asan o, tayê keyepelî akerdî. La tu yewêk ne eşka dewam bikero û ne zî eşka havilêk bikero. Belkî nînan ra tena DersimInfo bi hawayêko zeîfek bineyke xo ver ro dano.

Hetanî nika nêzdîyê di hezarî eserî Zazakî.Net de weşanîyayê. Heme zî eserê weçîniteyî ke wina pak redakte bîyê, bi metodê îlmî dîzayn bîyê. Çi keso ke kirdkî (zazakî) û kirdan (zazayan) meraq keno yan înan ser o xebatêk keno, xo rê Zazakî.Net ra îstîfade keno. Her roje dorê 300-400, aşme de dorê des hezarî IPê cîyayî Zazakî.Netî zîyaret kenê.

Zazakî.Net sebîlulah, sey yew hênîyê esîlî herikîyeno. Kam ke wazeno kirdan (zazayan) ser o cigêrayîşêk bikero, heme melumatî yenê verê destê ey. Kopya bike û dosyaya xo ra bidusne. Hende. Ne zehmetêk, ne ezîyetêk.

La eke merdim hênîyêk ra awe bişimo, ganî nankorîye nêkero! Nankorîye înkarkerdişê kede ya, dizdî ya, mixanetî ya…

Ez zaf rast ameya. Tayê merdimî gama ke Zazakî.Net ra îstîfade kenê yan melumatêk neql kenê, çimeyê xo nusenê. La ez rast ameya ke tayê kesî zî estê Zazakî.Net ra îstîfade kenê, qet çime nênusenê. Sebebo ke nênusenê zî no yo. Yan partîzan ê, yan zî dişmenê kurdan ê! Mixanetîya xo ra çimê înan bar nêbeno ke nameyê Zazakî.Netî sey çime binusê.

Mesela, Unîversîteya Çewlîgî metnê ke emser sempozyumê diyine de pêşkêş bîyê, sey kitabî çap kerdê. Rîpelanê 500-516 yê kitabî de bi sernameyê “Zazaca Kitapların Tanıtımı” yew meqaleya mudirê Enstîtuya Ziwananê ke Tirkîya de Ciwîyenê ya Unîversîteya Çewlîgî Yar. Doç. Dr. Nusrettin Bolelli zî esta.

Meqaleya xo de vano “Yaptığımız araştırmayla vardığımız sonuca göre…” û behsê gelek çîyan keno la çimeyanê xo nîşan nêdano, nênuseno. Nêvano ez kamca ra nê çîyan musaya yan mi kamca de araştirma kerda. La ha meydan de ke qismêko muhîm yê nê melumatan Zazakî.Net ra, xebata ma ra girewtê. Kam meraq keno, wa meqaleya ey biwano û destê xo zî bido wijdanê xo ser!...

Nusrettin Bolelli yew lîsteya kitabanê zazakî zî peynîya meqaleya xo de weşanaya. Kunyeya kitaban, senî ke mi Zazakî.Net de qismê Kitabxaneyî de bi hawayêko standard nuştê, ey zî wina nuştê. Tabî ez naye vajî, mi zî kunyeya qismêkê muhîm yê kitaban kovara Vateyî ra neql kerdbî. Mamosta Malmîsanijî Vate de kunyeya kitaban amade kerdêne. Mi çimeyê xo nuşto, ez ancî nusena.

Ma kunyeya kitaban bi hawayêko standard nuşta. Yanî nameyê nuştoxî, nameyê eserî, nameyê weşanxaneyî, bajar û serra ke kitab weşanîyayo, rîpelê kitabî û yew zî fotografê qapaxê kitabî. Mesela wina: Malmîsanij, Herakleîtos, Jîna Nu, Uppsala, 1988, 96 rîpelî

Çîyo balkêş, lîsteya Nusrettin Bolelli de kunyeya qismêkê zaf zêde yê kitaban zî wina standard nusîyaya. Mi yew bi yew kontrol kerdî. Lîsteya ey de tena kitabê ke kunyeya înan Zazakî.Net de weşanîyaya standard ê. Yê bînî wina nîyê. Mesela,wina nuşto: Destur bide… Astare, Kemal

Hende. Kitab kamcîn weşanxane ra, kam bajar de û kamcîn serre de çap bîyo, çend rîpelî yo, bellî nîyo!

Keyepelê Zazakî.Netî, nika torra înternetî ser o tekane arşîvê kirdkî yo. Bi hezar zehmetî ameyo meydan. Ez zana Homayê mi zano ke mi çi kede daya nê keyepelî, mi tede çiqas zehmetî dîya. Mi çiqas çimê xo kor kerdî…

Heyran, tayê çîyê ke to înternet ra neql kerdê, ti çimeyanê sey toplumdusmani.net, nedirnedemek.com, diq.wikipedia.org, mevzuat.meb.gov.tr û eksisozluk.com nusenê. To nêmeyê meqaleya xo melumatanê arşîvê Zazakî.Netî ra girewto la ti çime nênusenê. Qey?

_______________

* Newepel, Rojnameyo kulturî yo 15 roje, Hûmare 40, Dîyarbekir 01-15 teşrîne 2012, r. 2

Na xebere 9611 rey wanîyaya
ŞÎROVEYÎ
Mürsel
Mamosta
Vate ti piyerî raşt. Merdim ked u zehmete ço yi gera nî wer û vîn nîkere. Silav û hurmete xwi şimarî şawena.
22 Nîsane 2014 Sêşeme 10:42
zaza
lice
sayın yazar herşeyin iyi zazaki.neti sürekli takip ediyorum fakat bi problem var na ne biz bu bunlar vb anlamını veren bizim ana ena eni kuldğımız ben sizin yazılarınızı okurken adeta kendimi formatlıyorum yanisıfırlıyrum bana tuhaf geliyor bana gore doğrusuda ena ana eni dir cunku dişil icin ana eril icin eno çoğul eni dir hayır anlamını verıni bitişik yazıyorsunuz mesela nêşka vb
14 Adare 2013 Panşeme 13:11
ez
zaza
ey mamoste té wexta nusnené ti né na tirki bu biz anlamani veren bizde ené ena ana bildgmz bu sozcugu yaziyrsn ben anlamyrm yazyi okuysm gelmyr
12 Adare 2013 Sêşeme 21:41