zazaki.net
20 Êlule 2017 Çarşeme
Girdîya Karakteran : 12 Punto 14 Punto 16 Punto 18 Punto
24 Hezîrane 2017 Şeme 10:16

Nuşteyê Edîtorî yê Rojnameyê Newepelî-4

Roşan Lezgîn
Ziwan, ganî derdê her ferdêk, her grûbêk û her partîyêk bo. Munaqeşeyanê sîyasî ra cor bo.

Merheba wendoxê erjayeyî,

Hûmara çarine ya rojnameyê ma zî vejîya. Ma hêvîdar ê ke înşalah hûmara çewresine, çar seyine û çar hezarine zî vejîyo.

Ma verê cû vato, ma hewna zî vajin. Vetişê nê rojnameyî de xaye û hedefê ma no yo ke kirmanckî (kirdkî, zazakî, dimilkî) rê yew havila ma bibo. Wendiş û nuştişê kirdkî zêde bibo. Nuştox û edîbê ma, hunermendê ma bizêdîyê.

Helbet ma zanê ke bi yew rojname her çî nêxelisêno. La eke ma biyarin vîrê xwu, tarîxê ma kirdan de na reya verên a ke yew rojname safî bi kirdkî vejêno, a game rolê rojnameyê ma zaf muhîm o. Coka ma zî bi no şuûr ewnîyenê nê karî ra.

Zaf kesê zanayeyî ke na xebate teqdîr kenê, piştgirîya ma kenê estê. Ma hemîne rê yew bi yew sipas kenê. Ê ke heqîqeten bi nîyetêko pak rexne û pêşnîyazanê xwu pêşkêş kenê zî tay nîyê. Ma înan rê zî yew bi yew sipas kenê. La ê ke çimnebarî, hesudî û bêhurmetîye kenê zî estê. Ma se bikerin? Hesudî û çimnebarîye zî xasîyetê însanan ê. Ma vajin, wa Homa înan hîdayet bikero û ma xwu rê karê xwu dewam bikerin.

Tayê dostê ma estê, helbet nîyetê înan baş o, la rexneyanê zaf basîtan kenê. Ti ewnîyenî çîyêko zaf basît kenê behane û bi nameyê rexneyî gala ma kenê. Tabî, nê hawa reaksîyonan ra merdim mutesîr beno la hewna zî ma ewnîyenê karê xwu ra. Ma hêvîdar ê ke rexneyî bi nîyetêkê pakî bêrê kerdiş, bimentiq bê.

Ziwan û kultur, meselayêka umûmî û mîlî ya. Eke mesela umûmî û mîlî bo, xas û amî pîya; her kesî eleqedar kena. Yanî ziwan, ganî derdê her ferdêk, her grûbêk û her partîyêk bo. Munaqeşeyanê sîyasî ra cor bo. Beno ke merdim sîyaset de terefdar yan zî mensubê partîya xwu bo. Û grûb û partîyanê bînan reyra reqabet bikero. Labelê ziwan milko muşterek yê heme ferdanê miletî yo.

Dînê ma, partîya ma, fikrê ma yê sîyasî cîya bê zî, gerek meselaya ziwanî de ma heme pîya bin. Vanê, nufusê kirdan (zazayan) çar mîlyonan ra vêşêr o. Eke ma çar mîlyon merdimî hetanî ewro nêbîyê wayîrê rojnameyêk, ez vana qey ma rê eybêko zaf pîl o!

Wendoxê erjayeyî,

Embazanê ma ra çend kesî estê, heqîqeten zaf ardimê ma kenê. Lazim o ke merdim nameyê înan vajo, qalê keda înan bikero. Mesela, birayê ma Deniz Dilar Pîrejmanij destpêk ra hetê ma keno. Hem ma rê nuseno, hem fikrê xwu vano, hem rojname vila keno. Hetanî ewro ma rê gelek aboneyî peyda kerdê. Hewna, embazê ma Newzat Anuk zî hem nuseno hem rojnameyê ma vila keno. Ey zî hetanî ewro ma rê epey aboneyî peyda kerdê. Mamosta Mistefa Şahîn zî hem nuseno hem rojnameyê ma vila keno. Hûmara diyine ra nat Enwer Yilmaz zî hem nuseno hem vila keno. Senî ke rojname vejêno, yeno dahîris nusxeyanê rojnameyî pêşîn herîneno û beno derûdorê xwu ra, merdimanê xwu ra vila keno.

Cayanê bînan de zî embazê ke hetê ma kenê, roje bi roje vêşî benê. Ma hemîne rê yew bi yew sipas kenê.

Labelê ma wazenê hetkarê ma hîna vêşî bibê. Mesela, esnaf û karsazê ma eşkenê reklamê xwu bidê rojnameyî. Her wendox eşkeno çend aboneyan peyda bikero. Eke ma bineyna dest bidin yewbînan, beno ke ma hûmara rîpelan 8 ra bikin 12 û beno ke ma hewte ra reyêk vejin.

No rojname yê ma hemîne yo. Xizmetê ziwan, huner, edebîyat û kulturê ma de yo. Bêrîn ma heme, her kes qasê qewetê xwu ra, rojnameyê xwu rê wayîrîye bikerin ke wa kirdkîya ma ya şîrine roje bi roje hîna geş bibo, aver şiro.

Hetanî yewna hûmare bimanên weşîye de.*

_______________

* Newepel, Rojnameyo kulturî yo 15 roje, Hûmare 4, Dîyarbekir 01-15 gulane 2011, r. 2

Na xebere 1408 rey wanîyaya
No nuşte hema şîrove nêbîyo.