zazaki.net
17 Teşrîne 2017 Îne
Girdîya Karakteran : 12 Punto 14 Punto 16 Punto 18 Punto
25 Sibate 2012 Şeme 15:18

Nuşteyê Edîtorî yê Rojnameyê Newepelî-14

Roşan Lezgîn
Labelê wina aseno ke dewlete qayîl a ke xortê kurdan esrar bişimê, coka qet mudaxele nêkena.

Eke zaf dûrî nêbo yan karê mi ecele nêbo zafê reyan mîyanê şeherî de ez wenênişena mînîbus yan otobuse, ez xo rê peyatî gêrena.

Tayê rojan, ez ver û verê rayîrê trêne ra şina semtê Ofîse yan eynî rayîr ra agêrena. Bitaybetî hela şanî, peyê dêsê semtê Batikentî de, ez vînena ke qefle bi qefle xortê ma yê tern û tezeyî dorê xetê trênê de esrar şimenê. Zafê înan emrê xo des-pancês yan vîstserre yê.

Cayo ke ez behs kena, mîyanê semtê Ofîse û papûra ke verê berê qolordî ra şina Batikent, o mîyan de yo. Wina korîdorêk, da-vîst metre hîra û qasê 250 metreyî derg. Hetêk de lojmanê îstixbarat û efseranê artêşa tirkan estê, heto bîn de zî apartmanê sîteyê Batikentî yê. Orte ra xetê trêne vîyareno. No rayîr bineyke metruk o, zêde kes piro nêşino nêno. Ge-ge yew-di kesî semtê Ofîse ra acor hetê Seyrantepe, Senayî û Huzurevlerî ser yenê yan zî cor de şinê hetê Ofîse ra.

Xortê ma yê tezeyî wina qefle bi qefle, di-hîrê kesî, çar-panc kesî, şeş-hewt kesî binê dêsê sîteyê apartmananê Batikentî de ronişenê. Yew dulikê kola yan awe xo mîyan de ronanê. Mi nêzdî ra bala xo nêdayo ser, la ez vana qey, hawayê nargîle yew bêj cîhaz virazenê û bi dore pê esrar şimenê. Heto ke dêsê eskerîye yo, esker nobete gêno. Yanî verê çimê eskeran de, verê çimê teşkîlatê îstîxbaratî de xortê ma esrar şimenê.

Neke tena nê korîdorê metrukî de, esas, hêgayo ke mîyanê semtê Seyrantepe û taxê Rezan de yo, vereşanêk ra dest pêkenê hetanî destê sibayî, ê doran ra zî kome bi kome esrar şimenê. Muheqeq sewbîna cayan de zî şimenê la mi nê bi çimê xo dîyê.

Ez her game wazena şêrî înan reyde qisey bikerî la ez zana ke tu havila mi nêbena.

Qanûnen ramitiş, rotiş, xo ser o çarnayîş û şimitişê esrarî suc o. Cezayê xo giran o. Labelê wina aseno ke dewlete qayîl a ke xortê kurdan esrar bişimê, coka qet mudaxele nêkena.

Rojêk ez verê xetê trêna ra şîyêne semtê Ofîse. O korîdoro metruk de, hewna çar-panc komê xortan ke her kome çar-panc kesî bîy, wina verê dêsî de tirûnc dabi, esrar şimitêne. Nê xortan ra qasê 20 metreyî wet, goşeyê dêsî de, serê kuçeyêkê tengekî de ke merdim hetê Batikentî ra uca ra vîyareno şino Ofîse, yew mînîbusa polîsan vinderta bî. Çend polîsî zereyê mînîbuse de çend hebî zî teber ra bîy. A roje zî parqê Koşuyoluyî de, verê abîdeyê heqanê merdiman de çend rêxistinanê sivîlan derheqê aşîtî û aramîya welatî de beyanat dayêne çapemenîye. Mi zana ke polîsan seba înan serê kuçeyî tepîşto.

Mi veng ro polîsan kerd, mi va, “Nê xortê ke binê dêsî de ronişte yê, şima vînenê?” Agêray ê hetî ser, ewnîyay. Dima, yewî va, “Se bî, çi esto?” Mi va “Nê xortê tern û tezeyî ha esrar şimenê. Esar qedexe yo, qanûnen şimitişê ey suc o!” Bi mi huyayî. Va, “O hoo! Dê hela biewnî aqilê xo ra. Ma zî va qey ti se vanî. Esas çîyo tehluke sîyaset o bira, wa nêkewê sîyaset, esrar çîyê nêbeno. Eke ma heme esrarkêşan dekîn hepis, ka hende ca esto birayê mi?...”

Sîyaset ra qestê înan xebata kurdayetîye bî helbet. Yanî wazenê ke xortê kurdan fek kurdbîyayîşê xo ra veradê, wa qetûqet esrar bişimê.

Dewleta tirkan; wezîfedar û selahîyetdaranê na newlete tim bi nê çimî ewnîyayê ma ra, tim muameleyê dewleta tirkan kurdan reyde wina bîyo. La ma!

_______________

* Newepel, Rojnameyo kulturî yo 15 roje, Hûmare 14,  Dîyarbekir 01-15 oktobre 2011, r. 2

 

Na xebere 1159 rey wanîyaya
No nuşte hema şîrove nêbîyo.