zazaki.net
21 Tebaxe 2017 Dişeme
Girdîya Karakteran : 12 Punto 14 Punto 16 Punto 18 Punto
15 Adare 2010 Dişeme 08:19

Netîceyê Musabeqeya Fiqrayan

Zazakî.NET

Keyepelê Zazakî.NETî bi amancê ke mîyanê şarê ma de kulturê nuştişê kirmanckî (zazakî) bineyna aver şiro, roja 04 teşrîne 2009 de yew musabeqeya fiqrayanê kirmanckî (zazakî) ya bixelate îlan kerdbî. Roja peyêne yê muracatê na musabeqe 01.03.2010 bî.

Fiqrayê ke na musabeqe de kewtê derece, ma cêr a îlan kenê.

1.Fiqraya yewine bi sernameyê “Şima Teskere Nêdanê, Dewlete Dana” yê Alî Aydin Çîçekî ya. Xelata aye 250 TL pere yo.

2.Fiqraya dîyine bi sernameyê “Şeltik û Şultik” yê Mehmed Elî Sadiqî ya. Xelata aye 150 TL pere yo.

3.Fiqraya hîrêyine bi sernameyê “Kam Kamî Mehf Kerdo [Kamî Kam Mehf Kerdo?]” yê Îsmaîl Guvenî ya. Xelata aye 100 TL pere yo.

4.Fiqraya çarine bi sernameyê “Ma go Çewres Rey Tira Vajî Delu” yê Serdar Bedirxanî ya. Xelata aye 50 TL pere yo.

5.Fiqraya pancine bi sernameyê “Şertê Îslamî Çendê [Çend ê]” yê Alî Beytaşî ya. Xelata aye 50 TL pere yo.

Ma her panc xelatgirewtoxan pîroz kenê. Seba ke eleqe nîşan da û beşdarê musabeqe bîy, ma heme beşdaran rê sipas kenê. Embazanê ke musabeqeya ma fînanse kerde rê zî ma cîya sipas kenê.

Zazakî.NET

 

* * *

Bê ke ma destê xo bidin metnê orîjînalan, her panc fiqrayê ke xelate girewta, ma cêr ra pêşkêş kenê:

I

ŞIMA TESKERA NÊDANÊ, DEWLETE DANA

Alî Aydin Çîçek

Yew dewe de yew merdimo kokim bîyo. Nameyê merdimî Qemer bîyo. Hîrê lajê Qemerî bîyê: Qedîm, Memed û Hesen. Qedîm û Memedî leşkerîya xo kerda û dore ameya Hesenî... Qemer rojê hêgayî awe dano û lajo qij Hesen zî ey rê ardim keno. Qemerî şelware sîyay kerde pay û dest de huyêde kan xebitîno.  O taw hewt şoreşgerî (gerîllayî) ênê lewê Qemerî. Tabî şoreşgerî Qemer û keyeyê ey rind nas kenê. Wexto ke ênê lewê   Qemerî, vane:

- Ap Qemer to rê qewete bo!

Qemer vano:

- Çimanê mi ser, heq razî bo.

Xeylê wext kunê verê qeseyan û kenê derg. Axirî peynîye de yew şorişger qaytê rîyê Qemerî keno û vano:

- Ap Qemer, to di lajê xo day dewlete û înan dewlete rê leşkerîye kerde. Ma vanîme to nê lajê xo yê qijî zî bide ma, wa bêro seba welatê xo, mîyanê ma de leşkerîya xo bikero.

Şorişger seke winî vano, Qemer gêreno domanan û bi vengo berz vano:

- Willayî şima rind vanê labelê şima teskera nêdanê, dewlete dana.

 

II

ŞELTİK ŞULTİK

Mehmed Elî Sadiq

Yew dewa Pali de yew cinîka viya û lacekê aye sêqur (êtim) estibî. Lacek beno pîl, wextê ey eskerê yeno û şono esker. Cinêk nizdî ameyîşê lacê xo, kê xo pak kena, mînder û cila rafînena, rarê lacê xo pawena.

Lacek esker ra yeno, maya ey zaf şâ bena, kêf aye yeno ca, seke dinya ê aye bibo.

Lacek esker de çend qale tirkî bander bîyo. Dekeweno wade, dormarê xo ewneyeno û veng dano maya xora, vano :

-Anê anê! Kaldır bu şeltik şultiklerî, ser yorgan döşeklerî.

Maya ey matbena, ewneyena halê lacê xo ra, qeherêna û xo bi xo vajeyena vana :

-Wîîî  Elîyê mi! Kê mi torî veşo. Şarê, zonê to to ra  girewto la zonê xo zî nêdayo to.

 

III

Kam kamî mehf kerdo?

Îsmaîl Guven

Nobetawe ser, Mem û Qubik danî pêro.  Qubik, her cayî Memî gon de verdeno. Qubik dima ra, kerdinê xo ra pîşman beno û Memî rê ardim keno, kincanî ey pakkerdiş de. Ewnîyeno gone gerîyaya her cayî kincan ra û pakkerdiş zor o, bi hers Memî ra vano: 'Hero Memo, to xo mehf kerdo. Na çi gona, gêrîyaya her cayî to ra?’

 

IV

MA GO ÇEWRES REY TIRA VAJÎ DELU

Serdar Bedirxan

Yew peyayo pîzveşn û zerrbirehm nîyadano ke tayn qicî kerran verbi yew merdimê pinasek, feqîr û belengazî danî.  Yeno nêzdîyê tutan, înan ra perseno: “ Qey çi rê şima kemeran erzenî no merdimî? Cey delu yo?” Gedan ra yew:“Delu nîyo labelê gamîna beno delu.”

 

V

ŞERTÊ  ÎSLAMÎ ÇENDÊ?

Alî Beytaş

Ap Xêlil ,destê ey de tizbê ,serê ey de telike , wertê dewa xo de bi loxat gêreno. Xafila,derdormê dewe beno  pirê leşkeranê  dewleta Tirkî. Nat qayt keno,dot qat keno  her ca pirê leşkerî yo. Verba qomitanî şono û  xafila  veng dano ,

-Emrê to sere û  çimanê mi ser baye qomitan vano.

Eke qomitan Ap Xêlîlî vîneno ,bi gamanê lerze şono lêy Ap Xêlîlî û ey ra  pers keno,

-Ti zî na dewe ra ya ,Apo  ?

Ap Xêlîl, hêdî hêdî pê vilê xo kineno ,

-Heya qomitan beg vano.

Qomitan, wîna pers  keno,

-Eke ez to ra çîye  pers  bikerî ,ti cuyabê  mi dana ya nêdana ?

Ap Xêlîl,

-Heya .Ez cuyabê to dano ma qêy nêdano. De vaje qomitan beg. Ti çi emir kena?

Qomitan,

-Eke ti zana  mi ra vaje, şertê îslamî çend hebê?

Ap Xelîl , qena xo nat bot ano  beno  û binê çima ra qomitanîde nîyadano.

-Şertê îslamî vîst  heba , Qomitan beg  vano.

Qomitan  çim û burîyanê xo qirişneno ,

-Nê. To nêzana vano.

Tornê Ap Xêlîlî, bi lerze xo resneno lêy kalikê xo,

-Kalik kalik , ponc vaje ponc vano.

Ap Xêlîl,qaytê tornê xo keno û binê lewa ra hûno,

- De şo  pînco heram.Ero çi poncê-ponca tu ya.Ez vîst vano merik qebul nêkeno, na ponce-ponca nê hêrî.

Na xebere 1531 rey wanîyaya
No nuşte hema şîrove nêbîyo.