zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
19 Tebaxe 2010 Panşeme 08:39

Ma Qanûnê Duwêsî Êlule Wedarîn

Meqale: Wehdet Sîwanij

Wextê referandumê 7ê teşrîna 1982yî de raya mi çin bî, mi bi xo yew bi yew cinî û camêrdanê dewa ma ra rica û minet kerd ke raya redî bidîn. Çunke ez o wext telebe bîya û mi 12ê êlule ra pey mekteb de zaf tehda dîbî. Serleşkerê (başçawiş) qereqolê Sîyerbê mekteb de zereyê odaya mudirî de paşta mi ser o dimê zengeneyî şikitbi. Heto bîn ra, tikê merdimê (şinasîyê) mi peyê berê hepsî de bîy û ez binê tesîrê înan de zî mendbîyo. O semed ra mi waştên ke wa yew raya teke zî qanûnê Evrenî rê nêşîro. Se hebî rayê dewa ma estbîy. Înan ra 64 hebî red 28 hebî qebul û 8 hebî zî veşaye hesibîyay. Pêroyê Çewlîgî de se ra neway û yew red vecîyay. Şarê Çewlîgî o wext Tirkîya de yew rekor şikitbi.

Şarê Çewlîgî derbeyê 12ê êlula 1980 ra pey hetê dewlete ra zaf şîdet, neheqî û zulim dî. Hema-hema ma şênî vacîn ke her keyeyê Çewlîgî ra yew kesî, yan zî şinasîyê înan maruzê şîdetê dewlete mendbi. O semed ra şarê Çewlîgî referandumê serra 1982 de neke nezanîye ra, bêters û bêxof, bi zanayîş va “ney”.

Mi emrê xo de yew rey raya xo daya, o wext zî weçînayîşê (vicînayişî) 1999î bi. Ez Adena ra namzetê parlementoyî bîyo û ez sindoqan ser ra gêraynî. Seba ke namzet her ca de şîyênî ray bido, mi zî belgeyê namzetîye nawit û yew ca de raya xo eşte. Sewbina ez nêşîyayo ray bido, çunke îqametgahê mi çin bi. Mi yew ban kîra kerdinî, polîsan wayîrê banî berdîn qereqol kuwayin û tehdîd kerdîn, vatên no terorîst o, ti gereka ey banê xo ra teber kerî. Ez ke dewe ra vecîyayo, ez şîyo Adena mi her şeş aşman ra yew ban bedelnayêne. Serranê 1990an de mi di rey waşt ez şiro dewa xo, her di rey zî eskeran nêverda. Ez Dara Hênî ra peyser açarnaya.

Goreyê fikrê mi ra, eke yew merdimî wextê referandumê serra 1982 de vato “ney”, vato “ez nê qanûnê 12ê êlule qebul nêkena”, karo exlaqî û biprensîb no yo ke ewro zî vaco “ez xora verê cû ra verba nê qanûnî bîyo, no qanûn wa wedarîyo”, wa vaco “belê”. Çunke 28 serrî yo ke dewlete bi nê qanûnî şarê ma belengaz kerd. 

O semed ra eke na pakête de tena yew madeyê qanûnê 12ê êlule zî dîyeno wera, gerek şarê ma vaco “Belê”.

Na xebere 1519 rey wanîyaya
No nuşte hema şîrove nêbîyo.