zazaki.net
23 Tebaxe 2017 Çarşeme
Girdîya Karakteran : 12 Punto 14 Punto 16 Punto 18 Punto
11 Sibate 2011 Îne 10:33

Kurdkî bi Hawayêko Resmî Parlamentoyê Îraqî de ya

Xebere: Zazakî.Net

Êdî kurdkî do sey ziwanêkê resmî parlamentoyê Îraqî de bêro qisey kerdene. Demeyêk verê cû lîsteya Hevpeymanîya Kurdîstanî bi hawayêko resmî muracatê serekîya parlamentoyê Îraqî kerdbi ke parlamenterê kurdî parlamento de bi kurdkî qisey bikerê û tercumanî qiseykerdişê înan biçarnê erebkî ser. No waştişê kurdan qebul bi û tîya ra pey do parlamenterê kurdî parlamentoyê Îraqî de bi kurdkî qisey bikerê. Qiseykerdişê înan do seba erebkî tercume bibo. Bi no qayde parlementoyê Îraqî bi hawayêko resmî beno di-ziwanin.

Nameyê lîsteya Hevpeymanîya Kurdîstanî  ser o parlamenterê kurdan Sîrwan Ehmedî roja 22.01.2011 de bi hawayêko resmî waştnameyêk dabi serekê parlamentoyê Îraqî Usame Necefî ke seba kurdkî tercumanêk bêro girewtene û parlamenterê kurdan parlamento de bi kurdkî qisey bikerê. Serekê parlamentoyî zî na waştene qebul kerdbi.

Resmîbîyayîşê ziwanê kurdkî parlementoyê Îraqî de hetê partîyanê ereban ra zî ame destegkerdiş. Mesela Berdevkê lîsteya El-Îraqîye Meysun Demelucî nameyê grûba xo ser o piştgirîya nê waştişî kerd. Meysun Demelucî va, “Kurdî şirîkê prosesê sîyasî yê Îraqî yê. Heqê înan esto ke bi hawayêko resmî bi ziwanê xo qisey bikerê ke desturê Îraqî de zî behsê ey beno. Ganî kurdî wayîr ro ziwanê xo vejîyê, hem parlamentoyê Îraqî de hem dezgeyanê resmî de kurdkî bêro qisey kerdene. Ziwanê kurdkî zî sey ziwanê erebkî ziwanê resmî yê Îraqî yo, coka ganî heme parlementerê Îraqî kurdkî zî bimusî.”

Hewna, endamê Hevpeymanîya Niştimanîye yê Îraqî Emir Kinanî zî derheqê na babete de va, “Ma nêwezanê bibîn manî ke ziwanê kurdkî parlemento û dezgeyanê resmî de bêro şuxulnayene. Çunke no heqêko meşrû yê kurdan o. Esas ganî dewreyê verênî de kurdan nê heqê xo biwaştêne. Desturê Îraqî heq û huqûqê kurdan eşkera kerdo, ganî kurdî fek heqê xo ra veranêdê.”  

Na xebere 1418 rey wanîyaya
No nuşte hema şîrove nêbîyo.