zazaki.net
17 Tebaxe 2018 Îne
Girdîya Karakteran : 12 Punto 14 Punto 16 Punto 18 Punto
08 Adare 2018 Panşeme 13:38

Kurdî, Verg, Qewet

Roşan Lezgîn

Tazîyeyanê ma de tim melayî qisey kenê. Zafê reyan meselikanê verînan vanê ke madeyê mi nêgêno ez goşdarî bikerî.

Ez ewro ancî şîya yew tazîye.

Mela Huseynî yew meselaya qiceke qisey kerde, zaf weşê mi şîye. Ez wazena tîya neqil bikerî.

Mela Huseynî va:

"Nika ez bipersî vacî heywano tewr biqewet kamcîn o, şima go vacê şêr o. Ne? Her kes vano şêr.

Labelê heywano tewr biqewet verg o. Heywano tewr qewetin verg o, la çi heyf ke bi qewetê nêzano.

Key pê hesîyeno ke heywano tewr qewetin o? Peynîya dinya de.

Wexto ke qîyamet beno ra, ewilî vayêko zaf pêt wurzeno, her çî dano xwu ver sipeno beno.

Tu heywan nêeşkeno enê vayî ver de vindero. Tenya verg xwu ver dano.

Verg peyê xwu dano hetê vayî, her di linganê xwu yê verînan çutmekî dano erd û xwu şidêneno.

Va hende bi guzm o ke pey ra dest pêkeno posteyê vergî ci ra keno, sereyê ci ser de qelibneno labelê verg xwu têwnêdano, deyax keno.

Verg ewnîyeno ke dinya de tu candar hendayê ey nêeşka vera vayî de deyax bikero, vano, wulay mi bizanayêne ez hende biqewet a, ez do bibîyêne hukimdarê heme heywanan."

Mela Huseynî dima wina dewam kerd, va:

"Meselaya ma kurdan û meselaya vergî eynî ya.

Qewetê ma qewetê vergî, aqilê ma aqilo peyîn.

Eger aqilê ma yo peyîn vernî de ma sere de bîyêne, wulay ewro hukimdarê dinya ma bî."

Na xebere 792 rey wanîyaya
No nuşte hema şîrove nêbîyo.