zazaki.net
19 Tebaxe 2017 Şeme
Girdîya Karakteran : 12 Punto 14 Punto 16 Punto 18 Punto
03 Hezîrane 2014 Sêşeme 07:31

KOMXEBATA PERWERDEYÊ BERZ YÊ KURDKÎ

Xebere: Zazakî.Net

Mesul û dersdarê unîversîteyanê ke beşê înanê kurdkî esto Wan de kom bîyî, perwerdeyê berz yê kurdkî munaqeşe kerd û qerarê muhîmî girewtî.

43 kadroyê akademîkî yê Beşê Ziwan û Edebîyatê kurdkî yê enstîtuyanê ziwananê ganîyan ke nika hewt unîversiteyanê Tirkîya de estê rojanê 31 gulane-1 hezîrane 2014 de seba yew komxebate ameyî pêser. Akademîsyenan komxebate de hem problemê xo munaqeşe kerdî hem zî derheqê ameyeyê perwerdeyê berzî yê kurdkî de qerarê muhîmî girewtî.

Beşdaran peynîya kombîyayîşî de yew vilaweka peynî ya muştereke seba rayêpêroyî vila kerde.

Vilaweka peynî ya beşanê ziwan û edebîyatê kurdkî wina ya:

Ma sey beşanê (bölüm) ziwan û edebîyatê kurdkî yê enstîtuyanê ziwananê ganîyan ke nika hewt unîversiteyanê Tirkîya de estê, mabênê 31ê gulane û 1ê  hezirane de, problemanê perwerdeyê kurdkî ser o komxebatêke (çalıştay) amade kerde. Ma netîceyanê na komxebata xo ya hempare raya pêroyî rê îlan kenê.

1)Ma qerar da ke komxebata ma her serre unîversîteyêke de bêro amadekerdiş.

2)Komxebate qerar da ke seba caardişê karanê komxebate, endamanê nê unîversîteyan ra komîsyonêk bêro viraştiş.

3)Komxebate qerar da ke seba yewkerdişê bername û mufredatê beşan xebate bibo.

4)Heme beşdaranê komxebate pêşnîyaz (öneri) kerd ke serranê 2014 û 2015 de, muracaatê akerdişê doktora hetê YÖKî ra bêro qebulkerdiş ke wendekarê masterî bişêyê (bieşkê) perwerdeyê xo yê akademîkî bidomnê (dewam bikê).

5)Komxebate qerar da ke ganî 1500 wendekarê lîsansê berzî yê bêtezî yê ke bi lehçeyanê kurdkî kurmanckî yan zî zazakî wendo û mezûn bîyê, ca de dest bi kar bikîn.

6)Hêvîya komxebate a ya ke beşê lisansî yê ziwan û edebîyatê kurdkî bikewîn mîyanê lîsteya beşanê ke formasyon gênê.

7)Komxebate waşt ke heme unîversîteyanê mintiqaya ma de beşê ziwan û edebiyatê kurdkî bêrîn akerdiş.

8)Komxebate waşt ke fakulteyanê perwerdeyî (eğitim fakülteleri) de beşê mamostayîya kurdkî bêrîn akerdiş û dosyayê ke YÖK de derheqê na babete de yê berîn qebulkerdiş.

9)Komxebate eşkera kerd ke seba şaxê mayzanistê (anabilim dalı) ziwan û edebîyatê kurmanckî û ziwan û edebîyatê zazakî, ganî komîsyonê mîyanê unîversîteyan (üniversitelerarası kurul) kadroyanê doçentî ako.

10)Komxebate qerar da ke beşê ziwan û edebîyatê kurdkî, hem têkilîyanê (ilişki) xo û unîversîteyanê Mintiqaya Federal ya Kurdîstanî hem zî têkilîyanê xo û heme sazgehanê sivîlan yê bi ziwan û edebîyatê kurdkî ra eleqedar aver bero.

11)Komxebate qerar da ke seba îlankerdişê babetanê tezan yê heme beşan, beşî yewbînî de têkîlî ronîn, nameyê tezanê ke qebul bîyê keyepelanê (ana sayfa) resmîyan yê beşan de îlan bikîn.

12)Komxebate qerar da ke heme beşê ma yê kurdkî, dersdayîş û nuştişê tezan de bitaybetî (özellikle) giranîye bidîn her di lehçeyanê kurdkî; kurmanckî û zazakî.

 

Na xebere 2303 rey wanîyaya
ŞÎROVEYÎ
rojhelat
tunç
şaxê mayzanistê (anabilim dalı)

Mi gore 'ana' manaya 'binge' de yo.

şaxê zanistê bingeyî
04 Hezîrane 2014 Çarşeme 14:07
hah!
sipîyenî
Nê xebatî zaf erjîyaye yî.
12)Komxebate qerar da ke heme beşê ma yê kurdkî, dersdayîş û nuştişê tezan de bitaybetî (özellikle) giranîye bidîn her di lehçeyanê kurdkî; kurmanckî û zazakî.”

Nika mi fotografê Nusrettîn Bolellî dî, ez bineyke tê menda. No mamosta par Çewlîg de vatênî zazakî kurdkî nîya. Ez vaj dê Homayî hîdayet dayo ci :)
03 Hezîrane 2014 Sêşeme 10:13