zazaki.net
28 Adare 2024 Panşeme
Girdîya Karakteran : 12 Punto 14 Punto 16 Punto 18 Punto
06 Tebaxe 2010 Îne 21:09

Koçerîye Mîyanê Kurdan ra Darîyena we

Xebere: Zazakî.Net

Koçerê mintiqaya Qendîlî ya Kurdîstanê Başûrî topbarananê artêşa pasdaranê Îranî û bombardumananê frokeyanê şerî yê artêşa Tirkîya ver heywananê xo bi pereyêko zaf kêmî roşenê bazirgananê Îranî û terkê koçerîye kenê.

Goreyê ke keyepelê PUKmedia dano zanayene, Kurdîstanê Başûrî ra seba gelek welatanê cîhanî, bitaybetî seba Îranî her roje dewar û pes şawîyayênê. La nika bazirgananê Îranî ra qismêk rewşa aloznayî ya şerî ra îstîfade kenê û koçeranê zozananê koyê Qendîlî ra pes û dewaran bi ercanî erînenê.

Bayîz Hesen Mewlûd ke sermîyanê êlêkê koçeranê zozananê koyê Qendîlî yo û nika zozanê Melaxe de maneno ke wayîrê 400 sereyî pesî yo, vano “Cuya ma û heywananê ma tehluke de ya. Mîyanê nê di serran de topbaranê artêşa Îranî ver 50 sereyî pesê ma telef bîy. Nika ez wazena heme pesê xo biroşî, fek koçerîye ra vera bidî û şêrî Qeladize.”

Bayîz Hesen Mewlûd vano “Ez nêşêna bi asanî heme pesê xo açarna cayêkê ewledarî, hende pes ancax zozanan de weye bibo. Tîya zî cuya ma û heywanan pîya tehluke de ya. Bazirganê hetê Îranî naye zanê. Coka her roje gelek bazirganî hetê Îranî ra bi qaçaxîye yenê û bi pereyêko ercan pesê ma herînenê.”

Hemed Resûl Hemûd ke o zî koçerêkê zozanê Şemolê yê koyê Qendîlî yo, na babete de wina vano: “Emser rewşa koçeranê zozananê Berbaxe, Xêlat, Sergomî Kirme Soran, Şemol, Xirendol, Tatî Do, Sîrne, Pêloje, Xwar, Kawlane, Sêkoçke, Malex û Berderde zaf xirab o. Nê zozanî heme amey veşnayene. Herçiqas Îranî rayîr nêgirewto ke koçerî bivîyarê mîyanê erdê Îranî la ma bi xo nêwazenê şirê. Nika mintiqaya Qendîlî sey welatakê bêwayîrî yo. Gelek bazirganê Îranî yenê koçeranê ma talan kenê û şinê. Bi no qayde hem ma koçerî bi xo û hem zî ekonomîyê Kurdîstanê Başûrî zerarêko gird vîneno.”

Bazirgananê îranijan ra yew ke nêwaşt nameyê xo bido, na babete de wina vano: “Ma bi rayîrê qaçaxîye sînor vîyarnenê yenê nê doran. Nê karî de ma rastê bi desan zehmetî û tehlukeyan benê. Reya esta ke ma dekewenê dafika artêşa pastaran. Heywananê ma ma ra gênê û dest danê ser. Eke ma nêkişê zî ma teslîmê mehkemeya leşkerî kenê. Ma bi zor koçeran ra pes nêherînenê, ma peran danê û herînenê. No karêko meşrû yê bazirganîye yo. La ganî ma rast vajin ke qîymetê heywanan emser serranê verênan ra zaf ercanêr o.”

Axir bi no qayde, senî ke rîyê şerî ra, rîyê operasyonanê leşkerî û bombardûmananê frokeyanê artêşa tirkan ra Kurdîstanê Bakurî de peynî ro cuya koçerîye ameye, nika zî bi eynî sedeman koçerîya ke zozananê koyê Qendîlî yê Kurdîstanê Başûrî de bena, êdî peynî ro ci yeno. Seke yeno zanayene, koçerîye yew kulturo tebîî yo ke hezaran serrî de ameyo meydan. Eke keyeyêk terkê koçerîye bikero êdî mumkin nîyo ke reyna dest pêbikero.

Na xebere 3181 rey wanîyaya
No nuşte hema şîrove nêbîyo.