zazaki.net
25 Teşrîne 2017 Şeme
Girdîya Karakteran : 12 Punto 14 Punto 16 Punto 18 Punto
31 Çele 2013 Panşeme 01:06

KIRDKÎ Û EZ

Murad Celalî

Vateyêkê pîlan esto, vanê, merdim domanê wextê xo yo. Gama ke merdim nê vateyî ser o bifikirîyo, do raştîya ey fêm bikero. Nêzdîyê des, des û panc serrî verê cû ez zî sey heme kurdanê kurmancan derheqê tarîx, edebîyat û kulturê şarê xo de zaf nêzan bîya. Min nêzanayêne ke kurdî zî sey heme miletanê cînaranê xo wayîrê tarîx, edebîyat û kulturê xoserî yê. Çunke min dewê xo, zozanê xo sey merkezê kurdan hesab kerdêne. O wext mezgê min de cîhanê kurdî hîra nêbî.

Min nêzanayêne ziwanê kurdî yew ziwano dewlemend, wayîrê panc lehçeyanê xo yê girdan o. Her yew lehçeya ci zî qandê yew ziwanê xoserî hîra û zengîn a. Labelê gama ke min çekuya kurd eşnawite, min vatêne qey tena qalê kurmancan kenê.

La, badê ke ez ameya Îstanbul, sûka ci de ciwîyaya, min dî ke kurd nameyê miletêkê girdî yo. Kurdkî zî nameyê muşterek yê heme kurdan o. Mîyanê xo de kurdî sey kurmanc, kird, soran, goran û lor yenê namekerdiş. Bi wendişê kitabanê tarîx, ziwan û kulturê kurdan ser o, êndî ez musaya ke kurdî cîhaneko dewlemend o, ez zî yew endamê ey o.

Zanîngeh de zaf miletan ra telebeyî estbî, hem welatanê teberî ra hem zî mîyanê welatî ra. La ma gencê kurdan ziwanê xo nezanayêne. Ma xizmet û kedkarîya ziwan, tarîx û kulturî miletanê bînan de bî. Demê ke min kitabê kurdkî şinasnayî, êndî yew bero newe min ver de abî. Çi kitabî kewtî min ver min wendî, sey merdimêkê têşan û vêşanî min xo eşt mîyanê dinyaya wendiş û musayîşî. Bi şinasnayîşê kovara Nûbiharî ez bîya wendoxê ziwanê xo kurdkî, kurmanckî.

Nika bî hîrê serrî ez sey roja verine biheyecan a. Çira? Ez kirdkî musena, bi şinasnayîşê Zazakî.Net û Newepelî. Bi heskerdişê Homayî ez wazena nê karê xo berdewam bikerî.*

_____________

* No nuşte "Newepel, Rojnameyo kulturî yo 15 roje, Hûmare 35, Dîyarbekir, 16-31 tebaxe 2012, r. 4" de weşanîyayo.

E-mailê Murad Celalî: muradcelali@gmail.com

Na xebere 1609 rey wanîyaya
No nuşte hema şîrove nêbîyo.