zazaki.net
21 Tebaxe 2017 Dişeme
Girdîya Karakteran : 12 Punto 14 Punto 16 Punto 18 Punto
15 Çele 2013 Sêşeme 01:58

Kirdkî de Tezo Tewr Verên

Tarîxê Tirkîya de na reya verên a ke yew tezê zazakî qebul beno. Wayîra tezî mamosta Nadîre bi serkewtene mudafayê tezê xo kerd û mezun bîye.

 

Kirdkî de tezo tewr verên yê lîsansê berzî hetê Unîversîteya Artuklu ya Mêrdînî ra qebul bi. Tez bi sernameyê “Folklorê Kirmancan (Zazayan/Kirdan/Dimilîyan) Ser o Cigêrayîşê” yo û hetê nuştoxa rojnameyê Newepelî û endama “Grûba Xebate ya Vateyî” Nadîre Guntaş Aldatmaz ra amede bîyo. Sehaya xebata tezî Dêrsm, Licê û Sêwreg a.

Mudîrê Enstîtuya Ziwananê ke Tirkîya de Ciwîyenê ya Unîversîteya Artuklu Prof. Dr. Qedrî Yildirimî bi munasebetê qebulbîyayîşê tezê tewr verên yê bi kirdkî, roja 14.01.2013 de banê unîversîte de yew kombîyayîşê çapemenîye organîze kerd û seba ke yew çîyo tewr verên pêşkêş kenê, keyfweşîya xo îfade kerde. Prof. Dr. Qedrî Yildrimî va: “Tarîxê Tirkîya de na reya verên a ke yew tezê zazakî qebul beno. Wayîra tezî mamosta Nadîre bi serkewtene mudafayê tezê xo kerd û mezun bîye.”

Prof. Dr. Qedrî Yildirimî dima da zanayîş ke înan verê cû zî reya tewr verêne yew kitabê derse bi zazakî (KURDÎ 5 Zazakî) amade kerdo û kitabê înan hetê wezaretê perwerdeyî ra ginayo çape ro ke nika dersa weçînita de yeno wendiş. Prof. Dr. Qedrî Yildrimî va: “Ma do nê tezî heme unîversîteyanê Tirkîya ra bişawîm. Mamosta Nadîre çarçewaya xebata xo de gelêk sanikî zî arêdayê. Eke munasib bo, ma do înan zî sey kitab biweşanîm.”

Prof. Dr. Qedrî Yildirimî va: “Kêmanîya akademîsyenanê zazayan esta. Coka heta ke mumkin bo wendekarê ma yê ke lîsansê xo yê berzî temam kenê, ma do enstîtuya xo de îstîxdam bikîm. Enstîtuya ma manaya pêroyî de wayîrîya kurdkî, manaya xususî de zî wayîrîya zazakî û kurmanckî kena.”

Nadîre Guntaş Aldatmaz zî da zanayîş ke a Anqara de manena û seba ke beşdarê programê lîsansê berzî bibo di serrî peynîya hewteyî de Anqara ra ameya bi Mêrdîn û va: “Tezê mi folklorê kirmancan ser o yo. La bi mintiqaya Dêrsim, Licê û Sêwregi sînorkerde yo. Ez folklorê nê mintiqayan ser o xebitîyaya. Mi xebata xo rasterast bi yewbînî dîyayîşê rî bi rî û seha de kerde. Seba ke mi nê warî de yew xebate kerda ez zaf zerweş a.”

Na xebere 1555 rey wanîyaya
ŞÎROVEYÎ
wa xeyr bo
mehemed çelîkten
Ellah bizêdno û ma zazayan rê xeyr bo
15 Çele 2013 Sêşeme 04:14