zazaki.net
22 Oktobre 2017 Yewşeme
Girdîya Karakteran : 12 Punto 14 Punto 16 Punto 18 Punto
15 Hezîrane 2011 Çarşeme 13:47

Kenan û Zerde

Mehmet Seyîtalîoglu

Keyeyî ware de bîy. Dewar, pes, verekî, bizêkî, golikî, gawanî, golîkwanî, berxwanî, bizêwanî, şiwanî pêro têhet bîy.

Kenan û Zerde hevalê yewbînî yê. Timûtim têhet bîy. Bi aşman û serran pîya wext derbaz kerdêne. Heşarê yewbînî bîy. Zerrîya înan jubînî rê estbî. Kay û kelebutê nê çîyan mîyan de yewbînî de benê eşkera. Gama ke ware de zaf manenê, no heskerdîşê înan xo çarneno beno eşq û meşqêde pîl.

Rojan ra rojê, wextê dewarê perojî beno nêzdî. Maya Kenanî ci ra vana:

- Kenan golîkî kotî yê? Wextê dewarê perojî amo. Saetêna mangeyî ênê, şo golikan bîya.

Kenan maya xo ra vano:

- Heya dayê. Ez şorî bîyarî.

Kenan rêça golikan çarneno ke golikî şîyê warê dewa Xarike. No ware kî warê înan ra hebê dûrî kuno. Kenan kî tayê wisonik beno. Xo rê xo de fikîrîno, vano “Ez se şorî golikan ê warî ra bîyarî?” Peyê cû qerar dano ci û vano, rayîra roştî a wa ke ez Zerde xo de berî. Labelê ez aye se qan bikerî. Bi nê vateyê mi senî bawerîya xo bîyaro? Xaftila xo rê xo de vano Ha! fikrêde newe ame aqilê mi. Ez şorî nê fikrê xo Zerde ra vajî û aye qan bikerî.”

Bi lerze şono leyê Zerde, ci ra vano:

- Zerdê ez ewro şîyo warê Xarike. Uja yew qantira çerçîyê geber bîya. Wayirî qantire caverdaya û uja ra şîyo. Barê aye kî pêro şuşe û tebax û tefûtalo bîn o. Bê ma pîya şîmê warê Xarike û xo rê tayê tefûtal bîyame.

Zerde bi Kenanî qan bena. Şona maya xo ra vana. A kî xo xo de vana, madem ke uja honde çî esto, ez şorî Sebre ra wajî. Sebre kêna Xase ya. Sebre waya Zerde ya pîl a. Sebre kî veyva xo ra vana. Bi no qeyde xebere ware ra bena vila û têde şarê warî pêhesîno. Kam ke na xebere pêhesîno, kuno re rayira warê Xarike. Şarê warî, rayira warê Xarike de sere nano jûbînî ser. Kunê teqala yewbînî û verba warê Xarike remenê. Qij û pîl, cinîk û cuyamêrd, zav-zeç têde ware ra vejîno. Ware beno tipûtal. Kenan û Zerde, virnîya têdîne xo resnenê warê Xarike. Kenan, şono goliqanê xo vîneno û cêno ano. Zerde şona mîyane warî de şuse û tebaxan ra cêrena. Şenik wextî ra dime dewijî ênê resenê înan. Ê kî warî mîyan de şuşe û tebaxan ra cêrenê. Labelê tawa çîyê nêvînenê. Korpoşman gêrenê ya û şonê keyanê xo. Kenan kî, bi no qeyde goliganê xo cêno beno warê xo.

Na xebere 1830 rey wanîyaya
No nuşte hema şîrove nêbîyo.