zazaki.net
26 Temmuze 2017 Çarşeme
Girdîya Karakteran : 12 Punto 14 Punto 16 Punto 18 Punto
16 Hezîrane 2017 Îne 20:51

KÎBIR

Roşan Lezgîn

Kîbir çekuyêka erebkî ya, ziwanê ma de yena manaya xwudbînî, xwuperestî, xwuecibnayişî, xwu merdimanê bînan ra pîl dîyayiş û mexrûrîyetê tewşî…

Ez sewbîna cayan baş nêzana la ma het herinda kîbrî de çekuya "nefs"î zî yena şuxilnayiş. Mi dîyo, merdimanê kîbrinan ra vanê "nefs tey esto".

Mi zaf merdimî dîyê, tena seba ke dîplomaya ci esta, yanî yew unîversîte wenda, vera mi de hende fexr biyo, hende bi kîbir ewnîyayo mi ra ke qet mevajên. Tayê zî estê, mesela, eke ti behsê ziwanî bikerê, ti ewnîyenê bi kîbr vano "To filan unîversîte de beşê ziwanî wendo?"

Herçî ez a, tena guneyê bi nê hawa merdiman yeno. Û ez vana şukir Homayî rê ke meydanê îlm û zanayiş û fam û feraset û belaxet û fesahetî meydanêko azad û serbest o; her kes tede muxeyer o. Kamo ke cehd bikero, nesîbê xwu gore xezînaya îlmê Homayî ra feyz gêno...

La hîna zaf mi merdimî dîyê, eke bineyke mal û milkê înan esto, eke hetê madî ra halê xwu bineyke weş o, mevajê ke feqîrîye ra ameyo, hende bi kîbir têwgêreno ke qet têwmedên!

Ez vana, kîbir, tam sifetanê şeytanîye ra yo; keso ke kîbir tey esto û kîbrê xwu merdiman ser o tetbîq keno, destbirak û şirîkê Şeytanî yo.

Ya Rebî, ti nê xasîyetê şeytanîye ra ma bisetirnê û merdimanê kîbrinan ma ra dûrî biberê.  

Quran de tewr akerde Sûreya Sadî de behsê kîbrê Şeytanî beno. Gama ke Homa xîtabê pêxamberî keno, Şeytanî ra behs keno, vano:

71. Rebê to melayîketan ra vatbi muheqeq ez do çamur ra beşerêk [însanêk] bixuliqnî.

72. Eke mi şeklê ey temam kerd û ruhê xwu ra puf kerd ci, tavilî ci rê şirên secde!

73. Heme melayîketî pêro pîya şîyî secde.

74. Tena Îblîs nêşi secde. Ey kîbr kerd û bi kafiran ra.

75. Homayî va: "Ey Îblîs! Çîyo ke nêverdeno ti eyê ke mi bi qudretê xwu xuliqnayo rê şirê secde çi yo? Kîbrî ti girewtî yan ti alîyan ra yê?"

76. Îblîsî va: "Ez ey ra hîna xeyrin a! To ez adir ra xuliqnaya, o çamur ra xuliqna."

77. Homayî va: "Vejîye uca [cenet] ra! Ti êdî yewo recimkerde yê.

78. Û muheqeq heta roja ceza lanetê mi ha to ser o!"

79. Îblîsî va: "Ey Rebê mi! O çax heta roja newe ra weriznayişî [ganekerdişî] muhlet bide mi."

80. Homayî va: "Hadê, ti înanê muhlet girewteyan ra yê.

81. Heta Roja [qîyametî] ke yena zanayiş."

Na xebere 164 rey wanîyaya
No nuşte hema şîrove nêbîyo.